Bisti na un Manera Apropiá Ta Mustra Rèspèt Profundo pa Dios
1 Pronto lo nos tin e onor di ta Yehova su huéspet na e Kongreso di Distrito 2003 “Duna Gloria na Dios.” Nos ta mashá gradesidu ku Yehova ta invitá nos na un bankete spiritual asina abundante! Nos por demostrá nos rèspèt profundo na dje i nos apresio pa su provishonnan spiritual dor di e manera ku nos ta bisti i peña.—Sal. 116:12, 17.
2 Limpi i Ordená: Nos aparensia mester reflehá e normanan di nos Dios, kende ta limpi i ordená. (1 Kor. 14:33, NW; 2 Kor. 7:1) Nos kurpa, nos kabei i nos uña mester ta limpi, i nos areglo personal mester ta na òrdu. Areglo personal kon-ku-ta ta normal awendia. Sin embargo, djis pasobra un artista òf ídolo di deporte ta bisti slòns no ta un motibu pa un kristian bisti asina. Si nos sigui moda, hende lo por tin difikultat pa mira e diferensia entre esnan ku ta sirbi e Dios berdadero i esnan ku no ta sirbié.—Mal. 3:18.
3 Bistí Ku Ta Pas pa un Minister Kristian: Ora apòstel Pablo a skirbi e superintendente kristian Timoteo, el a animá pa “hende muhé dòrna nan mes ku bistí apropiá, desente i moderá, . . . ku bon obra, manera ta pas pa muhénan ku ta teme Dios.” (1 Tim. 2:9, 10) Pa hasi sigur ku nos manera di bisti ta apropiá, ta nesesario pa pensa kuidadosamente riba esei. Paña mester ta na òrdu, limpi i modesto. Nan no mester ta buyá, ni provokativo.—1 Ped. 3:3.
4 Tambe Pablo a duna spièrtamentu pa tene kuidou pa no hasi di mas pa loke ta trata “kabei tur na flègt i oro òf pèrla òf bistí kostoso.” (1 Tim. 2:9) Balansa den uso di hoyas, makiyahe i otro kosnan di beyesa ta e proseder sabí pa un hende muhé kristian sigui.—Pro. 11:2.
5 E konseho ku Pablo a dirigí na hende muhé kristian básikamente ta apliká na hende hòmber kristian tambe. Ruman hòmbernan mester evitá estilonan ku ta reflehá estilo mundano. (1 Huan 2:16) Por ehèmpel, den algun pais paña ku ta keda muchu hanchu i grandi na kurpa ta popular. Pero e estilo aki no ta pas pa un minister di Dios.
6 Durante Rekreo: Ora rumannan ta asistí na e programa, mayoria di nan ta pone un ehèmpel ekselente den nan manera di bisti i peña. Sin embargo, informenan ta indiká ku algun ta bira negligente ora nan ta biaha bai òf bin di kongreso, òf ora nan ta rekreá despues di e seshonnan. En realidat, nos aparensia personal—sea durante programa òf na otro momentu—ta influensiá hende su punto di bista di e pueblo di Dios. Siendo ku nos ta bisti nos badge di kongreso, na tur momentu nos mester ta bistí di un manera ku ta pas pa un minister kristian. Esaki hopi bes ta impulsá otro hende pa elogiá nos i ta habri kaminda pa nos prediká.—1 Kor. 10:31-33.
7 Meskos ku un sonrisa amigabel ta habri nos kara, asina si nos manera di bisti i peña ta apropiá, e ta dignifiká e mensahe ku nos tin i e organisashon ku nos ta representá. Algun hende ku opservá nos durante e Kongresonan di Distrito “Duna Gloria na Dios” di e aña aki por sinti nan konmoví pa puntra dikon nos ta diferente, anto ku tempu bisa: “Laga nos bai ku boso, pasobra nos a tende [i opservá] ku Dios ta ku boso.” (Zak. 8:23) Laga kada un di nos mustra nos rèspèt profundo pa Yehova dor di nos manera di bisti i peña.
[Questions]
1. Kon nos por ekspresá nos apresio pa nos binidero kongreso di distrito?
2. Dikon ta importante pa nos ta limpi i na òrdu bistí?
3. Kon nos por hasi sigur ku nos aparensia ta na armonia ku e konseho na 1 Timoteo 2:9 i 10?
4, 5. Ki spièrtamentu tantu hòmber komo muhé kristian mester tuma na pechu?
6. Dikon nos mester mantené norma haltu den nos manera di bisti i peña ora nos ta biaha bai òf bin di kongreso, na e kongreso i despues di e seshonnan di kada dia?
7. Ki efekto nos manera di bisti i peña apropiá por tin riba otro hende?
[Box on page 5]
Presentá un Aparensia Dignifiká
▪ Ora di bai òf bin di kongreso
▪ Na e kongreso
▪ Durante rekreo