Aparensia Personal Desente i Digno di Elogio
1 “No tin riba Testigunan di Yehova! Boso hendenan ta kariñoso, nèchi bistí i ku masha rèspèt.” Esei ta loke un representante di hotèl a bisa di rumannan na un kongreso di distrito aña pasá. Na un otro kongreso, un trahadó di hotèl a bisa: “Ta bisto ku boso hendenan ta bisti pa agradá Dios.” Sí, hende ta opservá delegadonan di kongreso. P’esei nos kier bisti “na un manera digno di e evangelio.” Anto hopi bes esaki ta motivá hende ku no ta Testigu pa duna nos un kòmplimènt i tambe esei ta mustra bon kla ku nos ta sirbidónan di Dios. (Fil. 1:27) Segun ku nos ta prepará pa e kongreso di distrito, ta bon pa nos pensa di antemano riba nos aparensia.
2 “E sabiduria di ariba primeramente ta puru,” disipel Santiago a skirbi. (Sant. 3:17) Pa reflehá puresa òf desensia den nos aparensia por ta un desafio. Satanas su mundu inmoral ta influensiá hende pa adoptá stailnan di bisti i peña ku no ta moderá, i tambe stailnan sensual i straño ku no ta apropiá. (1 Juan 2:15-17) Pues anto, ora nos ta tuma desishon relashoná ku bistí i areglo personal, nos tin ku tene kuenta ku e konseho bíbliko pa “renunsiá impiedat i deseonan mundano i pa biba huisioso, . . . den e siglo presente.” (Tito 2:12) Nunka nos lo kier pa nos aparensia molestiá otro hende, sea ku ta nos rumannan, personal di hotèl i restorant òf otro opservadó.—1 Kor. 10:32, 33.
3 Bistí Modesto i Bon Areglá: Ora bo ta prepará pa kongreso, puntra bo mes: ‘Mi paña ta modesto òf e ta hala indebido atenshon na mi? E ta mustra rèspèt pa e sintimentunan di otro hende? Mi blusanan ta saka mi barika afó òf nan garganta ta muchu abou? Mi bistínan ta muchu sunú òf nan ta pèrtá? Mi paña ta limpi i no ta hole desagradabel? Ora mi ta relahá despues di programa, lo mi tin e aparensia nèchi i limpi di un sirbidó di Dios? Òf mi pañanan lo mustra ku mi ta kore tras di moda, òf nan ta slòns, demasiado kasual i inapropiá pa un delegado di kongreso ku ta bisti un badge? E pañanan ku mi ta bisti durante mi tempu liber lo duna mi bèrgwensa di duna testimonio informal?’—Rom. 15:2, 3; 1 Tim. 2:9.
4 Opservashon di kristiannan madurá por yuda nos. Esposanan mester puntra nan kasá kiko e ta kere ku otro hende lo pensa di nan bistí. Mayornan kristian por yuda nan yunan tiner den e aspekto aki. Ademas, rumannan muhé deboto mas grandi por ‘enkurashá e muhénan hóben pa ta huisioso i puru’ òf desente relashoná ku nan aparensia “pa e palabra di Dios no wòrdu desonrá.” (Tito 2:3-5) Nos publikashonnan ta duna nos yudansa útil mediante plachi- i potrètnan ku ta mustra kiko ta bistí modesto i bon areglá.
5 Duna Alabansa na Yehova: Kongresonan di distrito ta duna nos tur, pues no solamente e rumannan ku tin parti riba programa, un ekselente oportunidat pa alabá Yehova. Klaru ku nos kondukta i abla kristian lo duna onor na dje. Pero e promé kos ku hopi opservadó ta ripará di nos ta nos bistí i areglo personal. Laga nos tur duna alabansa na Yehova mediante nos areglo personal desente i digno di elogio.—Sal. 148:12, 13.
[Study Questions]
1. Pakiko nos mester pensa riba nos aparensia ora nos ta prepará pa e kongreso di distrito?
2. Dikon ta un desafio pa bo bisti i areglá bo mes na un manera desente?
3. Ki preguntanan lo yuda nos eksaminá nos aparensia personal?
4. Kon otro rumannan por yuda nos reflehá un aparensia desente?
5. Kon nos tur por duna alabansa na Yehova durante e kongreso?
[Box on page 6]
Yudansa pa un Aparensia Digno di Elogio
◼ E Palabra di Dios
◼ Analisá nos mes
◼ Opservashon di otro hende
◼ Publikashonnan kristian