Bo “Kier” Yuda Otro Hende?
1 Hesus tabata ègt interesá den hende. Ora un leproso a roga Hesus pa yud’é, Hesus a saka su man, a mishi ku e hòmber i a bis’é: “Mi kier, sea limpi.” (Mar. 1:40-42) Kon nos por imitá Hesus su aktitut di kier yuda otro hende?
2 Hende Interesá: Kada miembro di e kongregashon ta hunga un ròl den yuda hende interesá bira adoradó di Yehova. Ora hende resien interesá bin reunion, kumindá nan i sera konosí ku nan. Buska maneranan pa animá nan. Ekspresá apresio pa e komentarionan ku nan a duna i tambe pa e esfuerso ku nan ta hasi pa apliká prinsipionan bíbliko den nan bida. Yuda nan mira ku nan por haña berdadero amigu den e kongregashon.
3 Rumannan den Fe: Foral “esnan ku ta di e famia di fe” ta meresé nos yudansa den vários manera. (Gal. 6:10) Hopi di nan ta lucha ku problemanan di salú. Dor di hasi un bishita di animashon, nan ta haña e asosiashon ku ta asina importante i kisas bo por yuda nan den maneranan práktiko tambe. Tin ruman tal bes ta konfrontá otro difikultatnan den bida. Demostrá bo interes dor di dediká tempu pa skucha nan i animá nan. (1 Tes. 5:14) E ansianonan tambe tin mester di nos koperashon pa nan por kumpli ku nan responsabilidatnan. (Heb. 13:17) Dor di ta dispuesto i semper kla pa yuda, nos por “ta un enkurashamentu” pa nos rumannan den fe.—Kol. 4:11.
4 Miembronan di Famia: Tambe nos tin ku hasi esfuerso pa imitá Hesus su interes den hende ku ta den nos mes sírkulo di famia. Profundo interes ta motivá mayornan pa ‘lanta nan yunan den e disiplina i instrukshon di Yehova.’ (Efe. 6:4) Yunan por hasi nan parti dor di perkurá pa nan ta kla na tempu pa e studio di famia, òf ora di bai reunion di kongregashon òf sirbishi di fèlt. Yunan grandi por reflehá Hesus su kompashon dor di yuda nan mayornan siña biba ku e problemanan ku behes ta trese kuné, hasiendo esei ku ternura. Asin’aki i den otro maneranan mas, nos tur por “praktiká deboshon na Dios den [nos] mes famia.”—1 Tim. 5:4, NW.
5 Ora nos ta imitá Hesus dor di yuda otro hende, nos lo por aliviá problema i fortalesé e lasonan di nos famia i di e kongregashon. I e kos mas importante ta ku nos ta onra Yehova, “e Tata di miserikòrdianan.”—2 Kor. 1:3.