Bo Por Duna un Man?
1 Yehova semper ta buska manera pa duna su sirbidónan leal un man. (2 Kró. 16:9; Isa. 41:10, 13) Komparando Yehova ku un wardadó di karné amoroso, Isaias a skirbi: “E lo kohe e lamchinan den su brasa, i tene nan serka di su kurason; ku ternura e lo guia esnan ku tin yu chikitu.” (Isa. 40:11) Konsiderá algun manera ku nos por imitá Yehova su interes amoroso.
2 Yuda Hende Nobo: Nos por duna esnan nobo un man dor di invitá nan pa disfrutá di nos asosiashon edifikante. (Pro. 13:20) Un ruman hòmber ta kòrda kon e rumannan a dun’é un man ora ku el a kuminsá asosiá ku e kongregashon. El a bisa: “Tabatin un famia ku na vários okashon a inkluí mi den nan studio di famia. Segun ku mi a progresá, un pareha pionero hóben tabata invitá mi regularmente pa traha ku nan henter dia den sirbishi. Semper nos tabatin kòmbersashonnan spiritual masha dushi.” El a agregá: “Promé ku mi a bira un kristian mi tabatin e kustumber di sali riba djabièrnè i djasabra anochi. Pero e tempu ku mi a pasa huntu ku e rumannan a satisfasé mi nesesidat pa asosiashon.” E interes amoroso di e kongregashon a yuda e ruman hòmber aki bira firmemente establesí den fe, i awor e ta sirbi komo un miembro di e famia di Bètel.—Kol. 2:6, 7.
3 Edifiká Otro: Podisé nos ta mira un chèns pa duna un man ora nos rumannan ta enfrentá sirkunstansianan difísil. Ta posibel ku un publikadó ku ta malu por kompañá bo den duna testimonio via telefon òf durante un studio di Beibel, òf kisas asta bo por bin ku e studiante na su kas? Un mayor ku tin yunan chikitu lo no keda kontentu ku bo yudansa ora e ta den sirbishi? Akaso tin publikadónan tímido ku lo apresiá bo yudansa ora di hasi rebishita òf den algun otro rasgo di sirbishi? Interes amoroso den nos rumannan lo motivá nos pa buska maneranan pa edifiká nan.—Rom. 14:19.
4 Segun ku nos ta imitá Yehova su interes amoroso den su sirbidónan, nos ta fortalesé otro, nos ta yuda e kongregashon uni den amor, i nos ta glorifiká nos Tata selestial.—Efe. 4:16.