Sea un Persona Ku Ta Komuniká Efikasmente!
1 Pa kumpli ku nos enkargo di prediká i hasi disipel, nos tin ku pasa informashon pa otro hende. (Mat. 24:14; 28:19, 20) Asta entre amigu sa ta difísil pa komuniká. Kiko por yuda nos komuniká ku hende deskonosí ora di duna nan e bon nobo?
2 Di Hende Deskonosí pa Amigu: Purba pone bo mes na lugá di esnan ku bo ta aserká den sirbishi. Manera mundu ta awe, ta di komprendé ku algun hende ta bira deskonfiá, òf asta ta haña miedu, ora nan mira hende deskonosí. Esaki por stroba komunikashon. Kon bo por vense e miedu inisial di e hendenan ku bo topa? Un manera ku nos ta komuniká, asta promé ku nos bisa un solo palabra, ta via nos aparensia personal desente. Nos pañanan apropiá i komportashon serio i trankil por yuda kita hende su miedu.—1 Tim. 2:9, 10.
3 Un otro yudansa den komunikashon ta un manera di papia relahá i amigabel. Esaki ta trankilisá hende i ta duna nan mas smak di skucha. Pa logra esaki, bo mester ta bon prepará. Ora nos tin loke nos ta bai bisa bon kla den nos mente, nos lo ta ménos nervioso. I e pas mental ku nos tin por atraé otro hende na nos mensahe. Un señora a bisa di e bishita di un Testigu: “Loke mi ta kòrda di su kara ku un smail riba dje, ta su pas. Esei a intrigá mi.” Esaki a pone e señora skucha e bon nobo.
4 Kualidatnan Ku Ta Atraé: Nos tin ku mustra interes personal sinsero den otro hende. (Fil. 2:4) Un manera pa hasi esaki ta dor di no dominá e kòmbersashon. After all, komunikashon ta enserá skucha tambe. Si nos ta invitá nos oyentenan pa ekspresá nan mes i ta skucha nan komentario ku interes, nan ta sinti ku nos ta interesá den nan. P’esei ora bo oyentenan ta papia, no sea purá pa sigui ku e presentashon ku bo a prepará. Ekspresá apresio pa loke nan a bisa si bo por hasi esei sinseramente, i purba adaptá bo kòmbersashon na loke nan a bisa. Si nan komentario ta revelá ku tin algu ta preokupá nan, adaptá bo presentashon i trata loke ta preokupá nan.
5 Ser modesto i humilde ta yuda komunikashon bai suave. (Pro. 11:2; Echo. 20:19) Hesus a atraé hende pasobra e tabata “mansu i humilde di kurason.” (Mat. 11:29) Di otro banda, un aktitut di superioridat ta kita hende for di bo kurpa. Pues, ounke nos ta firmemente konvensí ku nos tin e bèrdat, ta sabí pa nos evitá di papia na un manera dominante.
6 Pero kiko si un persona su komentarionan ta indiká ku loke e ta kere no ta na armonia ku loke Beibel ta siña? Nos no ta obligá di korigié? Sí, na su debido tempu, pero nos no tin ku purba hasi esei na e promé bishita. Hopi bes ta mas mihó pa sigui papia riba ideanan ku nos i e doño di kas tin en komun promé ku nos kompartí siñansanan di Beibel ku lo e por haña mas difísil pa aseptá. Pa hasi esaki nos tin mester di pasenshi i takto. Pablo a pone un bon ehèmpel di esaki ora el a duna testimonio na e huesnan di e korte di Areópago.—Echo. 17:18, 22-31.
7 Mas ku tur kos, amor inegoista lo yuda nos ta personanan ku ta komuniká na un manera efikas. Meskos ku Hesus, nos tin ku sinti kompashon di hende ku ta “kansá i plamá, manera karné sin wardadó.” (Mat. 9:36) Esaki ta motivá nos pa hiba e bon nobo pa nan i yuda nan subi e kaminda ku ta hiba na bida. Nos mensahe ta un mensahe di amor, pues laga nos sigui anunsi’é na un manera amoroso. Hasiendo esei, nos ta imitá Yehova Dios i Hesukristu—e dos Personanan ku ta komuniká mas efikasmente den universo.