Mustra Interes Personal—Dor di Ta Prepará
1 Un bon preparashon pa sirbishi ta yuda nos mustra interes personal den otro hende. Kon asina? Ora nos ta bon prepará, nos ta ménos preokupá ku nos presentashon i asina nos por duna mas atenshon na e doño di kas. Ademas, un bon preparashon ta yuda nos dominá nos nervionan i permití nos papia di kurason. Pero kon nos por prepará un presentashon efikas?
2 Usa un Presentashon Ku Ta Pas: Skohe for di Nos Ministerio di Reino di yanüari 2006 un di e presentashonnan sugerí ku ta pas pa bo teritorio, i konsiderá kon bo por ekspres’é den bo mes palabranan. Adapt’é na bo teritorio. Por ehèmpel, si hopi bes bo ta topa hende di un sierto religion òf nashonalidat, pensa ki presentashon lo interesá nan. Dor di adaptá bo presentashon na e personanan ku bo ta papia kuné, bo ta mustra interes sinsero den nan.—1 Kor. 9:22.
3 Segun ku bo ta usa e presentashon ku bo a skohe, sigui refin’é. Bo palabranan di introdukshon ta hopi importante, pues opservá kon hende ta reakshoná riba bo introdukshon. E tema ta interesá nan? Nan ta reakshoná riba e preguntanan ku bo ta hasi? Si esei no ta e kaso, sigui hasi ahuste te ora bo haña un presentashon práktiko.
4 Yudansa pa Keda Kòrda: Hopi publikadó tin problema pa kòrda un presentashon ora nan yega na un kas. Si esei ta bo problema, bo a yega di train bo presentashon na bos haltu pa un otro hende tende? Esaki por yuda bo tene e ideanan kla na mente i presentá nan den un manera simpel i lógiko. Tambe e por yuda bo trata ku e diferente reakshonnan ku bo por haña bo kuné.
5 Otro yudansa pa keda kòrda ta skirbi un resúmen breve di e presentashon riba un pida papel òf karchi, i tira un bista riba dje djis promé ku bo yega na un kas. Tin publikadó ta sinti ku e rekordatorio breve aki ta yuda nan pa ta mas relahá i mas kapas pa kòmbersá ku hende. Den e maneranan aki, un bon preparashon por yuda nos mustra interes personal den otro hende i asina mehorá nos presentashon di e bon nobo.