Un Vidio Ku Lo Iluminá Bo i Motivá Bo!
Tabata aprel di aña 1951. Míles di Testigu di Yehova di eks-Union Soviétiko—famianan kompletu—a wòrdu rekohé, hinká den wagòn i deportá pa Siberia. Dikon e poderoso gobièrnu soviétiko tabata determiná pa kaba ku nan? Kon nos rumannan a sobrebibí i asta prosperá apesar di dékadanan di persekushon konstante? Lo bo haña e kontestanan den e vidio Fiel bou di Prueba—Testigunan di Yehova na Union Soviétiko. Wak e, i laga su mensahe iluminador motivá bo pa mantené bo propio fieldat na Yehova, pase loke pase!
Bo por kontestá e siguiente preguntanan? (1) Ki ora Testigunan di Yehova na Rusia a haña rekonosementu ofisial pa promé bes? (2) Promé i despues di Segundo Guera Mundial, kon Union Soviétiko a bin haña míles di famia Testigu aserka? (3) Di ki manera nan kreensianan tabata kompletamente na konflikto ku Lenin su filosofia? (4) Kiko Operashon Nòrt tabata, i kiko Stalin a spera di logra kuné? (5) Kiko e deportashon a nifiká pa e Testigunan, i kiko nan mester a hasi pa no wòrdu deportá? (6) Durante e biahe largu den trein pa Siberia, kon e rumannan a animá otro i sorprendé esnan ku a kapturá nan? (7) Ki sufrimentu e Testigunan mester a wanta na Siberia? (8) Ki provishon spiritual Yehova su pueblo a balorá mashá, i dikon? (9) Dikon nos rumannan tabata dispuesto pa riska nan bida pa nan por a haña nan literatura, i kon nan a sali viktorioso apesar di e esfuerso konstante di outoridatnan pa stroba nan di risibié? (10) Kon Khrushchev a sigui e atake riba e pueblo di Dios? (11) Kon outoridatnan a purba destruí e fe di muchanan Testigu? (12) Kiko nos rumannan tabata komprondé bon kla relashoná ku e motibu ku nan tabata wòrdu persiguí? (Anuario 2002, página 203-4) (13) Kon un atake total riba Dios su organisashon a kousa nèt un efekto kontrali? (Anuario 2002, página 220-1) (14) Kiko ta e soñonan ku a bira realidat pa e Testigunan di eks-Union Soviétiko? (15) Kiko ta loke a yuda nos rumannan wanta nan pruebanan, i kon e último esena di e vidio ta mustra ku loke Yeremías 1:19 ta bisa ta bèrdat? (16) Konta un di e eksperensianan di bida real di fieldat bou di prueba ku spesialmente a motivá bo.