Kiko Ta Bo Prioridat?
1 Hopi organisashon religioso ta pone énfasis riba hasimentu di obranan di karidat, manera traha skol òf hospital. Sin embargo, maske Testigunan di Yehova no ta lubidá di “hasi bon i di kompartí ku otro,” nan ta duna prioridat na yuda hende spiritualmente.—Heb. 13:16.
2 E Ehèmpel di Promé Siglo: Hesus a hasi hopi bon obra durante su ministerio riba tera, pero su trabou prinsipal tabata di duna testimonio di e bèrdat. (Luk. 4:43; Huan 18:37; Echo. 10:38) El a manda su siguidónan pa “bai i hasi tur e nashonnan disipel . . . i siña nan.” (Mat. 28:19, 20) I el a indiká ku esnan ku ta ehersé fe den dje lo hasi e trabou ku el a inisiá na un eskala hopi mas grandi. (Huan 14:12) Hesus a duna prioridat na e trabou di prediká pasobra esaki ta yuda hende konosé e kaminda pa salbashon.—Huan 17:3.
3 Apòstel Pablo a konsiderá su aktividat di prediká komo un “obligashon,” un rekisito ku e no por a ignorá. (1 Kor. 9:16, 17) E tabata dispuesto pa hasi kualkier sakrifisio, wanta kualkier prueba òf pasa dor di kualkier sufrimentu nesesario pa e kumpli ku su sirbishi. (Echo. 20:22-24) Apòstel Pedro i su kompañeronan a desplegá un aktitut similar. Asta ora nan tabata enkarselá i a haña sota, “nan tabata sigui siña hende i prediká Hesus komo e Kristu.”—Echo. 5:40-42.
4 Kiko di nos? Nos ta duna prioridat na e trabou di proklamá e bon nobo di e Reino i hasi disipel? Meskos ku Hesus, nos tin berdadero interes den esnan ku ta “kansá i plamá, manera karné sin wardadó”? (Mat. 9:36) Loke ta pasando den mundu i profesia bíbliko ta proba klaramente ku tempu ta kabando pa e mundu malbado aki! Si nos tin e importansia di e trabou di prediká bon kla na mente esei lo motivá nos pa sigui prediká ku entusiasmo.
5 Evaluá Bo Sirkunstansianan: Ya ku sirkunstansia personal hopi bes ta kambia, tempu-tempu ta bon pa wak si nos por hasi ahuste pa hasi mas den e trabou di prediká. Un ruman muhé tabata un pionero regular durante añanan ’50, ’60 i ’70 di siglo 20, pero el a hañ’é ta stòp di traha pionero pa motibu di salú. Sin embargo, ku tempu su salú a mehorá. Resientemente el a bolbe evaluá su sirkunstansianan i a saka e konklushon ku e por traha pionero atrobe. Esta kontentu e tabata ku el a asistí na e Skol di Sirbishi di Pionero na edat di 90 aña! Kiko di abo? Bo ta bai baha ku penshon òf ta kabando skol? Ora bo sirkunstansia kambia, lo bo por traha pionero?
6 Ora Hesus a ripará ku Marta “tabata mashá okupá ku tantu kos di hasi,” bondadosamente el a sugerí Marta ku lo e haña mas bendishon si e mantené kos simpel. (Luk. 10:40-42) Bo por simplifiká bo estilo di bida? Ta realmente nesesario pa tantu e esposo komo e esposa traha? E famia por biba di un entrada so si hasi algun ahuste? Hopi ta esnan ku a benefisiá spiritualmente dor di hasi ahustenan pa nan por hasi mas den sirbishi.
7 Laga nos tur sigui e ehèmpel ku Hesus i e apòstelnan a pone! Nos por tin sigur ku Yehova lo bendishoná nos esfuerso sinsero pa hasi mas den e trabou vital aki di prediká e bon nobo di e Reino.—Luk. 9:57-62.