E Sirbishi Kristian Ta Nos Trabou Prinsipal
1 Nos tur tin vários tipo di trabou ku nos mester hasi. Por ehèmpel, un di e tareanan ku Dios a duna bo ta pa perkurá pa bo famia. (1 Tim. 5:8) Sin embargo, e trabou ku bo tin ku hasi pa kumpli ku e rekisito divino ei no mester bira mas importante ku e trabou di prediká e Reino i di hasi disipel.—Mat. 24:14; 28:19, 20.
2 Hesus a pone un ehèmpel pa nos sigui dor di “buska promé e reino.” (Mat. 6:33; 1 Ped. 2:21) Ounke e no tabatin masha kos material, e tabata kompletamente okupá ku e hasimentu di e boluntat di su Tata. (Luk. 4:43; 9:58; Juan 4:34) El a hasi hopi esfuerso pa duna testimonio na tur oportunidat. (Luk. 23:43; 1 Tim. 6:13) El a animá su disipelnan pa nan tambe tin e mesun interes intenso den e trabou di kosecha.—Mat. 9:37, 38.
3 Imitá Hesus Awe: Nos por imitá Hesus su ehèmpel dor di hasi esfuerso pa hiba un bida simpel ku ta enfoká riba e sirbishi kristian. Si nos tin e kosnan básiko di bida, laga nos hasi kaso di e konseho di Beibel pa no sigui akumulá mas i mas kos di mundu. (Mat. 6:19, 20; 1 Tim. 6:8) Lo ta mas mihó pa nos trata di hasi mas den e trabou di prediká! Si nos sirkunstansianan ta difísil, laga nos hasi esfuerso meskos ku Hesus, i no permití e preokupashonnan di bida bira mas importante ku nos trabou prinsipal di deklará e bon nobo di Reino.—Luk. 8:14; 9:59-62.
4 Asta esnan ku tin hopi responsabilidat ta konsiderá e trabou di prediká komo di mayor importansia. Un ruman hòmber ku tin un famia grandi, un trabou di hopi responsabilidat i ta sirbi komo ansiano den e kongregashon kristian, a bisa: “Mi ta konsiderá sirbishi komo mi karera.” Un ruman muhé pionero a bisa: “Traha pionero ta bal hopi mas ku un karera eksitoso di mundu.”
5 Sin importá kiko ta nos sirkunstansia, laga nos sigui e ehèmpel di Hesus. Kon? Dor di hasi e sirbishi kristian nos trabou prinsipal.