Imitá Kristu den Bo Ministerio
1 Hesus a pone un ehèmpel pa nos sigui den nos ministerio. El a demostrá su amor profundo pa Dios i pa hende na hopi okashon i den vários manera. El a siña hende humilde e bèrdat i a efektuá obranan di bondat amoroso na benefisio di esnan ku tabata afligí i oprimí.—Mat. 9:35.
2 Hesus Su Ehèmpel i Siñansa: Hesus no a ser distraí dor di enbolbé su mes den asuntunan polítiko òf den esfuersonan humanitario na benefisio di komunidat. Tampoko e no a permití metanan ku bon intenshon desviá su atenshon ni haña prioridat riba su trabou prinsipal. (Luk. 8:1) El a enfoká riba e trabou di prediká e bon nobo di Reino komo e úniko solushon permanente pa e problemanan di humanidat. Hesus tabatin un trabou importante pa hasi i e mester a hasié den un periodo di tempu limitá. Ora e hendenan na Kapernaum tabata ke pa Hesus keda einan, el a bisa su disipelnan: “Laga nos bai otro kaminda . . . pa mi por prediká ayanan tambe; pasobra ta pa e motibu ei mi a bin.”—Mar. 1:38.
3 Despues ku Hesus a train su disipelnan, el a manda nan bai ku e instrukshon spesífiko aki: “Prediká, bisando: ‘E reino di shelu ta serka.’” (Mat. 10:7) El a siña su siguidónan ku e interesnan di Reino mester haña prioridat den nan bida. (Mat. 6:33) Hesus su último palabranan na su disipelnan promé ku el a bai shelu a mustra bon kla kiko nan mester a hasi. El a bisa nan: “Bai i hasi tur e nashonnan disipel di mi.”—Mat. 28:19.
4 Importansia di e Reino: E tópiko prinsipal di Hesus su kòmbersashonnan tabata e Reino di Dios, i el a urgi su disipelnan pa sigui su ehèmpel. Hende su esfuersonan pa solushoná problemanan di humanidat no por tin éksito. (Jer. 10:23) Ta e Reino di Dios so lo santifiká e nòmber di Dios i perkurá alivio permanente pa humanidat. (Mat. 6:9, 10) Ora nos siña e bèrdat di Reino na hende ku ta “suspirá i keha pa motibu di tur e abominashonnan ku ta wòrdu hasí,” esaki ta yuda nan hiba un bida felis i eksitoso awor i pega firmemente na un speransa konfiabel pa futuro.—Eze. 9:4.
5 Hesus ta sigui enbolbé su mes ku e predikashon di e bon nobo di e Reino di Dios, i e ta sigurá nos di su sosten. (Mat. 28:20) Te na ki grado nos ministerio ta kuadra ku e ehèmpel ku Hesus a pone pa nos? (1 Ped. 2:21) Den e último dianan krusial aki, laga nos hasi tur loke ta na nos alkanse pa pega estrechamente na e ehèmpel ku Hesus a pone den e ministerio!