Nos Prioridat
1. Kon Hesus a mustra ku e ministerio tabata importante p’e?
1 E ministerio tabata un prioridat pa Hesus. El a traha masha duru den e trabou di prediká, kanando sientos di kilometer den henter Palestina pa papia ku mas tantu hende posibel. El a hiba un bida simpel pa e por a dediká mas tantu tempu i atenshon na e ministerio. (Mat. 8:20) Ora e multitutnan tabata purba tene Hesus pa e kura nan hendenan, el a bisa: “Mi mester prediká e reino di Dios na e otro statnan tambe, pasobra ta pa e propósito akí mi a wòrdu mandá.”—Luk. 4:43.
2. Dikon e ministerio tabata asina importante pa Hesus?
2 Dikon e ministerio tabata asina importante pa Hesus? Pasobra e santifikashon di e nòmber di Yehova tabata e kos di mas importante p’e. (Mat. 6:9) I debí ku e tabata stima su Tata selestial, su deseo tabata pa kumpli ku e boluntat i tambe e mandamentunan di su Tata. (Juan 14:31) Ademas, realmente e tabata interesá den hende i kier a yuda nan.—Mat. 9:36, 37.
3. Kon nos por mustra ku e ministerio ta na promé lugá den nos bida?
3 Imitá Hesus: No ta fásil pa imitá Hesus i mantené e ministerio na promé lugá den nos bida, ya ku mundu ta tuma hopi tempu di nos i ta ofresé hopi distraishon. (Mat. 24:37-39; Luk. 21:34) P’esei, nos tin ku hasi sigur di e kosnan mas importante i apartá tempu pa prepará pa sirbishi i partisipá regularmente den e trabou akí. (Fil. 1:10, NW) Nos ta hasi esfuerso pa hiba un bida simpel i evitá di hasi uso kompletu di mundu.—1 Kor. 7:31.
4. Dikon ta masha importante pa nos pone prioridat na un manera korekto awor?
4 Ora tempu ta kòrtiku, un persona sabí ta pone prioridat. Por ehèmpel, si e haña sa ku un tempestat ta aserkando, lo e usa tur su tempu i energia pa perkurá pa e siguridat di su famia i spièrta su bisiñanan. Kosnan ku no ta dje importante ei tin ku warda. E tempestat di Armagedón ta aserkando rápidamente i tempu ta kòrtiku. (Sof. 1:14-16; 1 Kor. 7:29) Pa salba nos mes i esnan ku ta skucha nos, nos mester presta atenshon konstantemente na nos mes i na nos siñansa, sea den kongregashon òf kualke otro kaminda. (1 Tim. 4:16) Sí, pa nos por sobrebibí, nos ministerio mester ta un prioridat pa nos!