Alabá Yehova na Gran Manera
Lo Selebrá e Sena di Señor Riba 16 di Aprel
1 Segun ku 16 di aprel 2003 ta aserká, nos antisipashon ta bira mas grandi. Riba e anochi ei nos lo konmemorá e morto di Hesus, uniendo ku miónes di kompañero di fe rònt mundu pa glorifiká Yehova su nòmber. Yehova ta meresé tur nos alabansa pa e maravioso provishon di e reskate ku el hasi. Mediante esaki, lo e drama bendishonnan maravioso riba henter humanidat obediente. Di henter nos kurason nos ta uni ku e salmista pa proklamá: “[Yehova] ta grandi, i digno di ser alabá na gran manera.”—Sal. 145:3.
2 Esaki ta un bon temporada pa meditá riba Dios su bondat. I tambe pa meditá riba kon gradisidu nos mester ta na Yehova p’e echo ku el “a manda su Yu unigénito den mundu pa nos por a biba pa medio di dje.” (1 Huan 4:9, 10) Ora nos obedesé Dios i selebrá e Sena di Señor, esaki ta graba den nos kurason e echo ku Yehova “ta yen di grasia i kompashon . . . i ta grandi den miserikòrdia.” (Sal. 145:8) Sí, e reskate ta e muestra mas grandi di Yehova su amor pa henter humanidat. (Huan 3:16) Ora nos reflekshoná riba Dios su amor i kontemplá Hesus su kurso fiel di integridat, nos ta sinti nos motivá pa alabá Yehova. Durante henter eternidat, nos lo alab’é pa e inmenso amor ku el demostrá dor di hasi bida eterno posibel pa nos.—Sal. 145:1, 2.
3 Yuda Otro Hende Alabá Yehova: Apresio pa e regalo inigualabel di Dios, esta, e reskate, ta impulsá nos pa invitá otro hende pa uní ku nos den alabá Yehova. E salmista a ser inspirá pa skirbi: “Ku ánimo nan lo papia di e rekuerdo di bo gran bondat, i lo kanta ku goso di bo hustisia.” (Sal. 145:7) Aña pasá so, Testigunan di Yehova rònt mundu a dediká mas ku mil mion ora na e trabou di prediká. Kiko nan esfuersonan a logra? Tur siman, un promedio di mas ku 5.100 persona a batisá komo símbolo di nan dedikashon na Yehova. Un total di 15.597.746 hende a asistí na Memorial, inkluso un kantidat di mas ku 9 mion ku ainda no a kuminsá alabá Yehova komo publikadó di e bon nobo. Kier men tin un posibilidat grandi pa mas oumentu! Komo proklamadónan di Reino, nos ta apresiá nos privilegio di por deklará e bon nobo i dirigí e kurason di otro hende na Yehova, su Yu i e Reino.
4 Un manera ekselente pa animá otro hende pa onra Yehova ta dor di invitá nan pa uni ku nos pa selebrá e Sena di Señor. Bo a traha un lista di tur e hendenan ku bo kier invitá i tambe di personanan ku lo bo tin ku rekordá di e dia i e ora? Bo a duna un invitashon na tur e hendenan ku tin riba bo lista? Si no ta asina, probechá di e tempu ku a sobra pa bo hasi esei. Yuda nan komprondé e propósito di e selebrashon. Na e selebrashon, sea atento pa kumindá bishitantenan. Laga nan sinti ku nan ta bonbiní, laga nan sera konosí ku otro hende i elogiá nan p’e echo ku nan a bini.
5 Asistensia na Memorial por animá esnan nobo pa hasi progreso spiritual. Un studiante di Beibel ku ta sufri di trastorno di strès pòst-troumátiko, lokual ta pone ku ta masha difísil p’e bai den públiko, a bin Memorial. Ora nan a puntr’é kiko e ta pensa di e reunion, el a bisa: “Tabata un anochi masha sagrado mes, i ami tabata einan.” Desde e dia ei, el a kuminsá asistí na e reunionnan.
6 Despues di Memorial: Kiko por ser hasí pa yuda e hendenan interesá aki pa bira alabadónan di Yehova? Ansianonan lo wak ken ta esnan nobo ku a asistí na Memorial i hasi areglo pa publikadónan kualifiká bishitá nan mas pronto posibel pa repasá e kosnan refreskante ku nan a siña i opservá. Tin di nan kisas lo deseá di studia Beibel. Tambe mester invitá nan pa asistí na tur e reunionnan semanal di kongregashon, ya ku asistensia regular por oumentá nan konosementu di Beibel.
7 Areglonan ta ser hasí pa enkurashá tur persona iregular òf inaktivo pa asistí regularmente na e reunionnan. Si e ansianonan pidi bo pa yuda un hende ku a bira inaktivo pa bolbe partisipá den sirbishi di vèlt, aseptá esei gustosamente. Ora nos ta mustra tal interes amoroso na nos rumannan esaki ta na armonia ku apòstel Pablo su animashon: “Miéntras nos tin oportunidat, laga nos hasi bon na tur hende, i spesialmente na esnan ku ta di e famia di fe.”—Gal. 6:10.
8 Laga nos tur hasi un esfuerso spesial pa ta presente na Memorial riba 16 di aprel. Nos lo no kier pèrdè e okashon di mas sagrado aki pa alabá Yehova. Sí, awor i pa semper, laga nos alabá Yehova pa su obranan maravioso!—Sal. 145:21.