Asistensia Regular na Reunion Ta un Prioridat
1 Pa famianan kristian, asistí na reunionnan di kongregashon riba un base regular ta un prioridat. Pero e eksigensianan di bida djawe por hasi esaki un desafio. Akaso kosnan di hasi na kas, trabou òf hùiswèrk a kuminsá kita tempu ku e famia a apartá pa e adorashon di Yehova? Si nos ta mira kosnan for di e punto di bista di Yehova, esei lo yuda nos mantené nos prioridatnan.—1 Sam. 24:6, NW; 26:11, NW.
2 Un hòmber israelita deliberadamente a keda sin mira kosnan desde e punto di bista di Yehova dor di piki palu riba sabat. Podisé el a rasoná ku el a hasi esaki pa perkurá pa su famia òf ku esei tabata djis un kos chikí. Sin embargo, mediante e sentensia ku Yehova a dikta, Yehova a mustra ku sigui tras di aktividatnan mundano durante tempu stipulá pa adorashon ta un asuntu serio.—Num. 15:32-36.
3 Kon pa Trata ku e Desafio: Hopi hende tin un lucha pa evitá ku nan trabou ta stroba nan di asistí na reunion. Algun a superá e desafio aki dor di papia ku nan doño di trabou, kambia warda ku nan koleganan, buska un trabou mas kumbiniente òf dor di simplifiká nan estilo di bida. Un kos ta sigur, e sakrifisionan ei na fabor di adorashon berdadero ta agradá Dios mashá tantu.—Heb. 13:16.
4 Hùiswèrk tambe por ta un desafio. Un hóben a bisa: “Promé ku mi bai reunion mi ta hasi un parti di mi hùiswèrk i ora mi bin kas mi ta hasi sobrá.” Ora ku nan yunan no por a kaba ku nan hùiswèrk riba dianan di reunion, tabatin mayornan ku a splika e maestronan ku asistensia na reunionnan kristian tin prioridat den nan famia.
5 Koperashon i bon planiamentu ta kosnan klave pa e famia por kumpli ku kosnan di hasi na kas pa nan por yega e reunionnan na tempu. (Pro. 20:18) Por siña asta mucha chikitu pa nan ta kla bistí pa bai reunion na un ora spesífiko. Ku nan propio ehèmpel mayornan por inkulká e importansia di e reunionnan den nan yunan.—Pro. 20:7.
6 Segun ku e preshonnan di e sistema aktual di kosnan ta oumentá, ta masha importante pa nos asistí na nos reunionnan di kongregashon regularmente. Laga nos sigui mira asuntunan desde e punto di bista di Yehova i hasi asistensia regular na reunion un prioridat.—Heb. 10:24, 25.