‘Hancha Boso Kurason’
1 Den e hermandat kristian, nos kada un tin e responsabilidat di kontribuí na kariño i amistat den e kongregashon. (1 Ped. 1:22; 2:17) Nos por logra esei ora nos ‘hancha nos kurason’ pa mustra kariño na otro. (2 Kor. 6:12, 13) Dikon ta importante pa nos siña konosé nos rumannan bon?
2 Amistatnan Ta Bira Mas Fuerte: Segun ku nos ta konosé nos rumannan mas mihó, nos ta kuminsá apresiá nan fe, perseveransia i otro kualidatnan ekselente mas plenamente. Ta komo si fuera nan fayonan ta bira insignifikante pa nos, i nos lasonan di amistat ta krese. Dor ku nos konosé otro bon, nos ta den un mihó posishon pa edifiká i konsolá otro. (1 Tes. 5:11) Nos por bira “un enkurashamentu” pa otro pa asina yuda otro resistí e influensianan insaludabel di e mundu di Satanas. (Kol. 4:11) En bista di e último dianan yen di preshon aki, nos ta masha gradisidu ku nos tin bon amigunan den e pueblo di Yehova.—Pro. 18:24.
3 Bon amigunan por ta un fuente spesial di fortalesa i konsuelo ora nos haña nos ku pruebanan severo. (Pro. 17:17) Un kristian ku a lucha ku e sintimentu di ku e no ta bal nada, ta konta: “Mi tabatin amigunan ku tabata bisa mi kosnan positivo di mi mes pa yuda mi vense e pensamentunan negativo ku mi tabatin.” Amigunan asina ta un bendishon for di Yehova.—Pro. 27:9.
4 Mustra Interes den Otro Hende: Kon nos por hancha nos kurason pa mustra kariño pa nos rumannan den fe? Fuera di kumindá otro hende na reunion kristian, hasi esfuerso pa enbolbé nan den un kòmbersashon signifikativo. Mustra interes personal sin mete den nan asuntunan privá. (Fil. 2:4; 1 Ped. 4:15) Un otro manera pa mustra interes den otro hende ta dor di invitá nan pa un komementu serka nos. (Luk. 14:12-14) Òf bo por hasi areglo pa traha huntu ku nan den sirbishi di vèlt. (Luk. 10:1) Segun ku nos ta tuma inisiativa pa siña konosé nos rumannan mihó, nos ta promové unidat den e kongregashon.—Kol. 3:14.
5 Nos tin e tendensia di skohe solamente hende di nos mes edat òf hende ku ta interesá den e mesun kosnan ku nos, komo nos bon amigu? Nos no mester laga e faktornan ei limitá e amistatnan ku nos ta sera den e kongregashon. Tantu David ku Jonatan komo Ruth ku Noemí a forma lasonan di amistat fuerte apesar di nan diferensia di edat i background. (Ruth 4:15; 1 Sam. 18:1) Bo por ekspandé bo amistatnan? Esei por trese bendishonnan ku bo no a spera.
6 Dor di hancha nos kurason pa mustra kariño na otro hende, nos ta fortalesé otro i promové pas den e kongregashon. Ademas, Yehova mes tambe ta bendishoná nos pa e amor ku nos ta mustra na nos rumannan. (Sal. 41:1, 2; Heb. 6:10) Pakiko no pone komo bo meta pa siña konosé mihó mas tantu ruman posibel?
[Study Questions]
1. Ki responsabilidat nos kada un tin?
2. Dikon ta importante pa nos sera amistat ku nos rumannan den fe?
3. Kon nos por ta un enkurashamentu pa otronan?
4. Kon nos por siña konosé otro hende den e kongregashon mihó?
5. Kua ta un manera pa ekspandé nos amistatnan?
6. Kiko ta algun benefisio di hancha nos kurason pa mustra kariño na nos rumannan?