Nos Tin Ku Respetá Yehova Su Outoridat

Ku kiko bo ta relashoná e nòmbernan di antigwedat, Koré, Datan i Abiram? Ku rebeldia! Kontra kiko? Kontra outoridat ku Dios a instituí. Numbernan kapítulo 16 ta relatá e detayenan di nan proseder desastroso, i E Toren di Vigilansia di 1 di ougùstùs 2002 ta duna un resúmen di e asuntu den e artíkulo “Someté Bo Mes Lealmente na Outoridat Ku Dios A Duna.” Lo ta bon pa bo lesa e informashon aki promé, i despues wak e manera serio ku e vidio Respetá Yehova Su Outoridat ta presentá e asuntu aki. Lo bo mira e konflikto ku a desaroyá entre e yu hòmbernan fiel di Koré i nan tata rebelde, kende tabata den konflikto ku e Soberano di universo. (Num. 26:9-11) E drama di bida real aki mester motivá nos tur pa kultivá un lealtat asta mas profundo pa Yehova.

Segun ku bo ta wak e vidio, buska e puntonan ku ta indiká ku den seis área krusial Koré ku su kompañeronan rebelde no a pasa ku éksito e prueba di lealtat: (1) Kon nan a mustra falta di rèspèt pa outoridat ku Dios a instituí? (2) Kon nan a laga orguyo, ambishon i yalusí afektá nan? (3) Den ki manera nan a enfoká riba imperfekshon di e hendenan ku Yehova a nombra? (4) Ki aktitut di keha nan a desaroyá? (5) Kon bin nan no tabata satisfecho mas ku nan privilegionan di sirbishi? (6) Kon nan a laga amigu- i famianan haña prioridat riba lealtat na Dios?

Konsiderá kon e lèsnan ku nos a siña den e drama bíbliko aki ta apliká na nos punto di bista personal di outoridat ku Dios ta instituí awe: (1) Kon nos mester reakshoná riba desishonnan ku ansianonan den kongregashon ta tuma, i dikon? (2) Kon nos por kontrarestá kualke motivashon inkorekto ku nos tin? (3) Kon nos mester reakshoná riba imperfekshon di esnan nombrá pa hiba delantera? (4) Kiko nos mester hasi si un tendensia di keha kuminsá desaroyá den nos kurason? (5) Kon nos mester konsiderá kualke privilegio ku nos a haña? (6) Ken nunka no mester haña prioridat riba nos lealtat na Dios, i ki ora esaki por bira un tèst difísil pa nos?

Despues di a konsiderá e informashon aki den kongregashon, pakiko no wak e vidio atrobe? Lag’é graba asta mas ainda den bo mente e motibunan pakiko semper nos mester respetá Yehova su outoridat!—Sal. 18:25, NW; 37:28, NW.