Mantené un Sentido di Urgensia!
1 Hesus tabata sa ku e tempu ku e tabatin pa kumpli ku e trabou di su Tata aki riba tera tabata limitá. (Juan 9:4) Pues, el a kumpli ku su ministerio ku un sentido di urgensia, i el a siña su disipelnan pa hasi meskos. (Luk. 4:42-44; 8:1; 10:2-4) Komodidat material no tabata e kos di mas importante den su bida. (Mat. 8:20) Komo resultado, e por a kompletá e trabou ku Yehova a dun’é pa hasi.—Juan 17:4.
2 Tempu Limitá: E tempu pa prediká e bon nobo “den henter mundu” tambe ta limitá. (Mat. 24:14) Profesia bíbliko ta revelá ku nos ta bibando hopi leu den e tempu di fin. Djis aki, ‘esnan ku no konosé Dios i esnan ku no ta obedesé e evangelio di nos Señor Hesus lo risibí e pago meresí di pèrdishon eterno.’ (2 Tes. 1:6-9) E huisio ei lo yega diripiente. (Luk. 21:34, 35; 1 Tes. 5:2, 3) Hende mester realisá den ki situashon peligroso nan ta. Nos tin e responsabilidat di yuda nan buska Yehova su aprobashon miéntras ku tin tempu ainda.—Sof. 2:2, 3.
3 Hasiendo Tur Loke Nos Por: Dor ku Dios su sirbidónan ta rekonosé ku e ‘tempu ku a keda ta kòrtiku,’ nan ta duna prioridat na e trabou di prediká. (1 Kor. 7:29-31; Mat. 6:33) Algun a nenga bon oportunidatnan finansiero òf otro aktividatnan personal pa asina nan por oumentá nan partisipashon den e ministerio. (Mar. 10:29, 30) Otronan ta sigui ‘abundá den e trabou di Señor’ ounke kontinuamente nan ta haña nan ku prueba. (1 Kor. 15:58) Hopi di nan tin vários dékada ta deklará e bon nobo públikamente sin vasilá. (Heb. 10:23) Yehova ta duna masha balor na tur e tipo di sakrifisionan ei ku su sirbidónan ta hasi na fabor di interesnan di Reino.—Heb. 6:10.
4 Un kos ku por yuda nos tene e dia di Yehova bon na mente ta di laga e adorashon di Yehova—lokual ta inkluí e trabou di prediká—ta e punto sentral den nos bida. Esei ta protehá nos pa nos no ser distraí dor di e mundu di Satanas, i e ta fortifiká nos determinashon pa mantené kondukta santu. (2 Ped. 3:11-14) Sí, kumpli ku nos ministerio ku un sentido di urgensia por hiba na salbashon, tantu di nos mes komo di esnan ku ta tende nos.—1 Tim. 4:16.