Parti 3:—Kon pa Kondusí Studio di Beibel Progresivo
Usa e Skritura na un Manera Efektivo
1 Nos ta kondusí studio di Beibel ku e propósito di ‘hasi disipel’ dor di yuda hende komprondé i aseptá e siñansanan di e Palabra di Dios i apliká nan den nan bida. (Mat. 28:19, 20; 1 Tes. 2:13) Pa e motibu ei, e studio mester konsentrá riba e Skritura. Na prinsipio lo ta bon pa mustra e studiante kon e por haña e tekstonan den su mes Beibel. Pero kon nos por usa e Skritura pa yuda e studiantenan progresá spiritualmente?
2 Selektá Teksto pa Lesa: Ora bo ta prepará, buska pa sa kon kada teksto menshoná den e lès ta apliká na e tópiko ku ta ser konsiderá, i determiná kua ta esnan ku lo bo lesa i konsiderá durante e studio. Por lo general, ta bon pa lesa esnan ku ta mustra e base bíbliko di loke nos ta kere. Bo no tin nodi lesa tekstonan ku ta duna informashon históriko adishonal. Tene kuenta ku e nesesidat i sirkunstansia di kada studiante.
3 Usa Pregunta: En bes di splika e tekstonan na e studiante, laga é splika bo nan. Bo por anim’é pa hasi esei dor di usa pregunta na un manera ábil. Si e aplikashon di un teksto ta bisto, lo bo por djis puntra kon e teksto ta apoyá loke e paragraf ta bisa. Den otro kasonan lo bo tin ku hasi un pregunta mas spesífiko òf un seri di pregunta pa dirigí e studiante na e konklushon korekto. Si e studiante tin mester di mas splikashon, bo por duna esaki despues ku e studiante kaba di kontestá.
4 Keda Simpel: Hopi bes un bon tiradó di flecha tin mester di ún flecha so pa e alkansá su blanko. Asina tambe, un maestro ábil no tin mester di hopi palabra pa enfatisá un punto. E por transmití informashon na un manera simpel, kla i eksakto. De bes en kuando lo bo tin ku buska informashon den publikashonnan kristian pa komprondé un teksto i splik’é korektamente. (2 Tim. 2:15) Pero evitá di splika tur aspekto di kada teksto durante e studio. Inkluí solamente loke ta nesesario pa klarifiká e punto ku boso ta konsiderá.
5 Hasi Aplikashon Práktiko: Ora ta apropiá, yuda e studiante mira kon e tekstonan di Beibel ta apliká na dje personalmente. Por ehèmpel, ora di konsiderá Hebreonan 10:24 i 25 ku un studiante ku no ta asistí ainda na e reunionnan kristian, bo por papia kuné tokante un di e reunionnan i invit’é p’e asistí. Pero no pone preshon riba dje. Permití e Palabra di Dios motiv’é pa tuma e akshon nesesario pa agradá Yehova.—Heb. 4:12.
6 Segun ku nos ta kumpli ku e tarea di hasi disipel, laga nos promové ‘obedensia pa medio di fe’ dor di usa e Skritura na un manera efektivo.—Rom. 16:26.
[Study Questions]
1. Dikon nos mester pone énfasis riba e Skritura ora nos ta kondusí studio di Beibel?
2. Kon nos por determiná kua teksto di Beibel nos lo lesa i konsiderá?
3. Kiko ta e benefisio di usa pregunta, i kon nos por hasi esaki?
4. Kuantu splikashon nos mester duna pa e tekstonan ku nos ta lesa?
5, 6. Kon nos por yuda studiantenan apliká e Palabra di Dios den nan bida, pero kiko nos no mester hasi?