Provishon Nobo pa Yuda Nos Apstené di Sanger

Kuerpo Gobernante a aprobá pa kombiná partinan esensial di e dokumento di apoderashon duradero pa kuido médiko (na ingles, DPA) huntu ku e karchi di Instrukshon/Eksonerashon Médiko Delantá den un solo dokumento legal, ku en general lo ser yamá karchi di DPA.

E karchi di DPA lo ta válido pa tempu indefiní i lo fungi komo un deklarashon di bo deseonan. Den futuro lo bo tin ku yena un karchi nobo di DPA solamente (1) ora bo tin ku hasi kualke kambio riba bo karchi di DPA, manera kambia bo deseonan, bo representantenan den asuntunan di kuido médiko, adrès i number di telefon, òf (2) ora bo a pèrdè bo karchi di DPA òf e no ta sirbi mas, òf (3) ora bo ta biaha pa eksterior. Den e kaso ei lo bo tin ku yen’é na ingles òf na e idioma prinsipal di e pais ku bo ta bishitá.

Analisá e karchi di DPA huntu ku orashon i yen’é kuidadosamente na kas. Sin embargo, promé ku bo firma e karchi, ta importante pa sigui e prosedura legal estriktamente. Por ehèmpel, siendo ku bo karchi ta bisa ku dos testigu a mira bo firma e karchi, nan mester ta presente ora bo firm’é. Periódikamente, superintendentenan di studio di buki por wak si rumannan ku no a yena e karchinan nobo mester di yudansa.

Promé ku bo dobla e karchi di DPA, saka fotokopia di bon kalidat pa bo representante den asuntunan di kuido médiko, representante supstituto i bo dòkter, i tambe un pa bo warda pa bo mes. Tambe bo por traha kopia pa otro miembronan di famia i e sekretario di kongregashon. Mester traha kopia riba un banda di papel A4, ku e karchi di DPA nèt meimei riba e blachi. Bo mester kana ku e karchi di DPA original, no ku un fotokopia.

E Karchi di Identifikashon ku tin e fecha di imprenta 3/99 pa yunan no-batisá di mayornan Testigu no a kambia. Mayornan tin ku hasi sigur ku kada yu menor di edat tin un karchi ku ta debidamente yená i firmá i ku e yu ta kana kuné na momentunan apropiá.

Publikadónan ku no ta batisá por usa e palabranan di e karchi di DPA i Karchi di Identifikashon pa skirbi instrukshonnan pa kuido médiko pa nan mes i pa nan yunan. Durante aña, e sekretario mester perkurá pa tur publikadó ku kaba di batisá haña un karchi di DPA.