Parti 5: Kon pa Kondusí Estudio di Beibel Progresivo
Determiná Kuantu Informashon pa Trata
1 Ora Hesus tabata siña su disipelnan, el a tene kuenta ku nan limitashonnan, papiando ku nan “segun nan por a komprondé.” (Mar. 4:33, BPK; Juan 16:12) Awe, maestronan di e Palabra di Dios tambe tin ku determiná kuantu informashon ta rasonabel pa nan trata durante un estudio di Beibel. E kantidat di informashon ku por trata durante un estudio ta dependé di e kapasidat i sirkunstansia di tantu e maestro komo e studiante.
2 Edifiká un Fe Firme: Algun studiante tin mester di dos òf tres seshon di estudio pa kapta loke otro studiante ta komprondé fásilmente den un solo seshon. Ta mas importante pa nos yuda e studiante haña un bon komprondementu ku pasa rápidamente dor di hopi informashon. Kada studiante mester di un base sólido pa e fe ku nan a haña awor den e Palabra di Dios.—Pro. 4:7; Rom. 12:2.
3 Segun ku bo ta kondusí e estudio kada siman, tuma e kantidat di tempu nesesario pa yuda e studiante komprondé i aseptá loke e ta siñando for di e Palabra di Dios. No pasa muchu lihé dor di e informashon ya ku e studiante lo no benefisiá plenamente di e bèrdatnan ku e ta siñando. Sòru pa bo tin sufisiente tempu pa konsentrá riba e puntonan prinsipal i pa konsiderá tekstonan klave ku ta proveé e base pa e siñansanan.—2 Tim. 3:16, 17.
4 Evitá di Desviá for di e Tema: Ounke nos lo ke evitá di pasa purá-purá dor di e estudio, nos ke evitá tambe di desviá for di e tema. Si un studiante ta inkliná na papia hopi riba asuntunan personal, kisas nos lo tin ku hasi areglo pa papia riba eseinan ora nos kaba di studia.—Ekl. 3:1.
5 Di otro banda, nos propio entusiasmo pa e bèrdat por pone ku nos ta papia di mas durante e estudio. (Sal. 145:6, 7) Un punto adishonal òf un eksperensia aki i aya por enrikesé un estudio. Pero pa nan no stroba e studiante di haña un konosementu eksakto di e siñansanan básiko di Beibel, nos lo no ke pa nan ta muchu hopi òf largu.
6 Dor di trata un kantidat rasonabel di informashon durante kada seshon di estudio, nos ta yuda studiantenan di Beibel ‘kana den e lus di Yehova.’—Isa. 2:5.