Hasi Bon i Kompartí ku Otro Hende
1 Dorkas “tabata abundá den echonan di karidat i bon obra.” (Echo. 9:36, 39) Su spiritu generoso a pone ku tantu Yehova Dios komo e hendenan ku a konos’é, a stim’é. Hebreonan 13:16 ta bisa: “No laga di hasi bon i di kompartí ku otro; pasobra sorto di sakrifisionan asina ta agradá Dios.” Kon nos por hasi bon i kompartí ku otro hende awe?
2 Un manera ku nos por benefisiá otro hende ta di kompartí nos “rikesa” òf kosnan balioso ku nan. (Pro. 3:9) Nos donashonnan pa e obra mundial ta hasi posibel ku rònt mundu rumannan por traha Salòn di Reino, Salòn di Asamblea i fasilidatnan di sukursal. Nos generosidat a yuda miónes di hende benefisiá di instrukshon teokrátiko i asosiashon spiritual edifikante.
3 Duna Konsuelo: Ora desaster surgi, Yehova su pueblo ta kla pa “hasi bon” na tantu nan kompañeronan di fe komo na hende ku no tin mesun fe ku nan. (Gal. 6:10) Despues di un eksploshon den un planta kímiko na Fransia, un pareha ku ta biba banda di e planta a bisa: “Mesora nos rumannan kristian a bin yuda nos limpia nos apartamento i tambe di otro hende den e edifisio. Nos bisiñanan a keda hopi sorprendí ora nan a mira kuantu hende a bin yuda nos.” Un otro ruman muhé a agregá: “E ansianonan a sera kabes pa sostené nos. Nan a bin enkurashá nos. Bon mirá, esei ta loke mas nos tabatin mester, mas ku yudansa material.”
4 Ounke tin hopi manera ku nos por hasi bon na nos próhimo, e manera di mas benefisioso ku nos por yuda nan ta di kompartí e presioso konosementu di e bèrdat ku ta inkluí “e speransa di bida eterno” ku Yehova mes a primintí. (Tito 1:1, 2) E mensahe di Beibel ta trese berdadero konsuelo pa hende ku ta lamentá pa motibu di e situashon di mundu i nan propio estado pekaminoso. (Mat. 5:4) Laga nos hasi bon i kompartí ku otro hende ora ta den nos man pa hasi esei.—Pro. 3:27.