Sigui Edifiká Otro
1 Apòstel Pablo a hasi tur su posibel pa fortalesé su rumannan den fe. (Echo. 14:19-22) Asina tambe, nos ta preokupá ora nos rumannan ta konfrontá situashonnan difísil, i nos ke yuda nan. Beibel ta indiká ku ta tur ruman mester mustra interes den otro, i no djis e ansianonan so. (Rom. 15:1, 2) Konsiderá dos manera ku nos por hasi kaso di e konseho amoroso: “Enkurashá otro i edifiká otro.”—1 Tes. 5:11.
2 Tuma Nota di e Nesesidatnan di Otro Hende: E Palabra di Dios ta informá ku Dorkas a “abundá den echonan di karidat i bon obra.” (Echo. 9:36, 39) El a tuma nota di esnan ku tabata den nesesidat i a hasi loke e tabata por pa yuda nan. Ki un ekselente ehèmpel el a pone pa nos! Kisas abo ta haña sa ku un ruman di edat tin mester di transpòrt pa bin reunion. Òf por tin un pionero ku no tin hende pa sali kuné den sirbishi un atardi den siman. Si bo haña sa di tal nesesidat, imaginá kon lo bo enkurashá e respektivo rumannan ora bo ofresé nan yudansa práktiko.
3 Kòmbersashonnan Spiritual: Nos por edifiká otro tambe dor di loke nos ta papia. (Efe. 4:29) Un ansiano ku eksperensia a remarká: “Si bo ke enkurashá hende, papia tokante kosnan spiritual. Pa kuminsá un kòmbersashon edifikante, lo bo por hasi un pregunta simpel manera por ehèmpel: ‘Kon bo a haña e bèrdat?’” Mustra un interes sinsero den hóbennan den e kongregashon. Tuma e inisiativa pa papia ku rumannan ku ta deskurashá i esnan ku podisé ta tímido. (Pro. 12:25) No laga kòmbersashon riba entretenimentu di mundu kita tempu for di bon kòmbersashonnan spiritual ku rumannan den fe.—Rom. 1:11, 12.
4 Pero kiko bo por bisa pa edifiká otro hende? Durante bo lesamentu i estudio personal di Beibel resientemente, bo a haña un prinsipio ku a oumentá bo apresio pa Yehova? Tin un punto ku bo a tende den un diskurso públiko òf durante e Estudio di Toren di Vigilansia ku a animá bo? Òf bo kurason a ser konmoví pa un eksperensia ku a fortalesé bo fe? Si bo ta warda e hoyanan spiritual ei manera un tesoro, semper lo bo tin algu animante di kompartí ku otro hende.—Pro. 2:1; Luk. 6:45.
5 Dor di ofresé yudansa práktiko i usa nos lenga na un manera sabí, nos por sigui edifiká otro.—Pro. 12:18.