Parti 9: Kon pa Kondusí Estudio di Beibel Progresivo
Prepará Studiantenan pa Duna Testimonio Informal
1 Ora Andres ku Felipe a realisá ku Hesus tabata e Mesias primintí, nan no por a keda sin konta otro hende tokante e notisia emoshonante aki. (Juan 1:40-45) Awe tambe, ora studiantenan di Beibel kuminsá ehersé fe den loke nan ta siñando, nan ta sinti nan impulsá pa papia tokante esei. (2 Kor. 4:13) Kon nos por animá nan pa duna testimonio informal i prepará nan pa hasi esei na un manera efikas?
2 Lo bo por puntra e studiante si el a papia ku otro hende tokante e kosnan ku el a siña for di Beibel. Kisas tin amigu i famia ku lo e por invitá pa djòin e ora e ta studia. Puntr’é si tin kolega di trabou, kompañero di skol òf otro konosínan ku a mustra interes. Di e manera aki e por kuminsá duna testimonio. Yud’é mira ku nos mester siña distinguí situashonnan i mustra rèspèt i amabilidat ora nos ta papia ku otro hende tokante Yehova Dios i su propósitonan.—Kol. 4:6; 2 Tim. 2:24, 25.
3 Siña Nan Kompartí Nan Kreensianan: Ta masha importante pa siña studiantenan di Beibel kon pa usa e Palabra di Dios ora nan ta kompartí nan kreensianan. Na sierto puntonan durante e estudio, puntra e studiante: “Kon lo bo usa Beibel pa splika e bèrdat aki na bo famia?” òf “Kua teksto di Beibel lo bo usa pa proba esaki na un amigu?” Wak kon e ta kontestá, i mustr’é kon pa basa su siñansanan riba e Skritura. (2 Tim. 2:15) Dor di hasi esei bo ta prepará e studiante pa duna testimonio informal, anto ora e ta kualifiká lo e por duna testimonio den e trabou di prediká huntu ku e kongregashon.
4 Ta sabí pa prepará studiantenan di Beibel pa enfrentá oposishon. (Mat. 10:36; Luk. 8:13, NW; 2 Tim. 3:12) Ora otro hende bin ku pregunta òf bisa algu tokante Testigunan di Yehova, esaki por habri kaminda pa studiantenan duna testimonio. E foyeto Testigonan di Jehova—Ken Nan Ta? Kico Ta Nan Creencianan? por prepará nan pa ta kla pa defendé e bèrdat i ta “semper dispuesto pa duna kontesta.” (1 Ped. 3:15) E tin informashon eksakto ku esnan nobo por usa pa yuda famia i amigunan—ku ta opon’é kisas sin mal intenshon—komprondé nos kreensia- i aktividatnan ku ta basá riba Beibel.