Programa di Famia: Sirbishi di Vèlt Komo Famia
1 Yehova ta gusta mira hóbennan alabá su nòmber. (Sal. 148:12, 13) Den tempu di Hesus asta “mucha chikitu i yunan na pechu” a duna alabansa na Dios. (Mat. 21:15, 16) Awendia ta e mesun kos. Mayornan, kon boso por yuda boso yunan bira alabadó seloso di Yehova den e ministerio kristian? Un biaha mas, manera e artíkulo aki riba tokante reunionnan di kongregashon a enfatisá, un faktor importante ta boso ehèmpel. Un tata a ekspresá loke mayoria mayor ta eksperensiá ora el a bisa: “Bo yunan no ta hasi loke bo ta bisa; nan ta hasi loke bo ta hasi!”
2 Un ruman muhé ku a wòrdu kriá dor di mayornan temeroso di Dios ta kòrda: “Nunka nos tabata lanta riba un djasabra mainta i puntra si nos ta bai sirbishi. Nos tabata sa ku nos ta bai.” Asina tambe, abo por inkulká den bo yunan e importansia di e obra di prediká dor di establesé un rutina semanal konsistente pa partisipá den sirbishi di vèlt komo famia. Esaki no solamente ta duna bo yunan e oportunidat pa siña for di bo ehèmpel, sino tambe e ta duna abo e chèns pa opservá nan aktitut, komportashon i abilidatnan ku ta desaroyando.
3 Entrenamentu Progresivo: Pa yunan por disfrutá di e ministerio, nan mester ta prepará pa por partisipá di un manera efikas. E ruman muhé menshoná den e paragraf anterior a bisa tambe: “Nunka nos tabata djis kana tras di nos mayornan pa kompañá nan den nan trabou di prediká. Nos tabata sa ku nos tabatin ku partisipá, maske esei tabata djis pa primi bèl i laga un papel di invitashon. Dor di preparashon kuidadoso promé ku e aktividatnan di kada fin di siman, nos tabata sa loke nos lo a bisa.” Bo por duna bo yunan e tipo di entrenamentu ei dor di tuma un par di minüt tur siman pa prepará nan pa e ministerio, sea durante e estudio di famia òf na un otro okashon.
4 E predikashon komo famia ta duna bo un oportunidat adishonal pa inkulká e bèrdat den bo yunan. Un tata kristian tabata hiba su yu muhé huntu kuné ora e tabata kana 20 kilometer, ida i buèlta, pa e bai parti tratado na habitantenan ku tabata biba tras di un seru. Ku hopi kariño e yu muhé ta kòrda: “Tabata durante e oranan di kanamentu ei ku mi tata tabata inkulká e bèrdat den mi kurason.” (Deu. 6:7) Ohalá ku abo tambe wòrdu bendishoná pa e echo ku bo a hasi e sirbishi di vèlt parti di boso programa semanal di famia.