Programa di Famia: Estudio di Famia
1 E regalo di mas grandi ku abo komo mayor kristian por duna bo yunan ta di inkulká bo amor pa Yehova den nan. Un momentu importante durante kua bo por hasi esei ta ora “bo ta sinta den bo kas” p’e estudio semanal di Beibel komo famia. (Deu. 6:5-7) Sea ku bo tin un kasá kreyente, òf bo ta biba den un kas dividí pa motibu di religion òf ta un mayor soltero, bo por yuda bo yunan hala serka bo i hala serka Yehova dor di tene un estudio di famia regular.
2 Kon pa Kuminsá: E promé paso ta pa haña e kustumber di studia komo famia. Si bo no sa sigur ki ora pa tene e estudio, kisas lo bo por papia ku bo famia tokante esei. (Pro. 15:22) Si bo tin yu chikí, kisas lo bo preferá di tene e estudio vários bes pa siman pero den seshonnan mas kòrtiku. Determiná ki programa ta mas mihó pa bo famia. Anotá un orario fiho pa e estudio riba bo programa di famia, i sea determiná pa pega na dje.
3 Kiko boso lo por studia huntu? Tin famia ta prepará e lès di Estudio di Buki di Kongregashon òf e Estudio di Toren di Vigilansia huntu. Otro famianan ta konsiderá informashon spesialmente prepará pa hóbennan. Un tata ku tin un yu muhé i un yu hòmber chikí a bisa: “Un kos ku ta pone ku e estudio di famia ta un momentu spesial den siman pa nos yunan ta ku nos ta aktua esenanan for di Mi buki di relato bíblico. Loke ta hopi mas importante ku e kantidat di paragraf ku nos a kubri ta kuantu impreshon e informashon a hasi riba nan i kon profundo nan a komprondé e lès.”
4 Studia Tur Siman: Mester tene e estudio di famia riba un base regular i kada miembro di famia mester antisip’é ku smak. Pa loke ta trata e dia i ora di e estudio, por permití sierto grado di fleksibilidat pa si akaso un situashon inesperá presentá. Tin bes ku lo ta nesesario tambe pa trata un otro tópiko. Pero kualke ahuste nesesario na e programa establesí di e estudio di famia lo mester ta temporal. Un yu muhé a komentá: “Si mester kambia e ora di nos estudio, Tata semper ta pone e ora nobo riba porta di frishidèr, asina nos tur sa ki ora lo e ta.” Tal esfuerso pa mantené un estudio di famia regular ta meresé elogio! Segun ku bo ta lanta bo yunan ‘den e disiplina i instrukshon di Yehova,’ bo ta demostrá bo amor tantu pa nan komo pa nos Tata selestial.—Efe. 6:4.