Kaha di Pregunta

◼ Mester nota studio di famia riba rapòrt di sirbishi?

Si un mayor kristian ta kondusí un studio di famia den kua yunan ku no ta batisá ta partisipá, e mayor por raportá un máksimo di ún ora pa siman, ún rebishita pa siman i ún studio di Beibel pa luna. E mester hasi asina asta si e studio ta dura mas ku ún ora, si e ta kondusié mas ku ún bes pa siman òf si e ta studia ku e muchanan individualmente.—Wak e buki Nos Ministerio, página 104.

Si tur hende den kas ta Testigu batisá, no por nota ni e ora ni e studio riba rapòrt di sirbishi di vèlt (a ménos ku tin un yu ku a batisá kaba pero ku ainda ta studia e di dos buki). Esaki ta asina pasobra e rapòrt di sirbishi di vèlt di e kongregashon ta reflehá primeramente loke ta ser lográ den e trabou di prediká e bon nobo i siña e bèrdat bíbliko na hende ku no ta sirbidó dediká i batisá di Yehova. (Mat. 24:14; 28:19, 20) Sin embargo, esaki no ta hasi un studio di famia riba un base regular algu di ménos importansia.

Ta responsabilidat di mayornan kristian pa studia ku nan yunan. Esnan ku tin mester di un man pa establesé òf mehorá nan studio di famia por pidi e ansianonan yudansa. Mester konsultá ku e superintendente presidente òf e superintendente di sirbishi si debí na sirkunstansia ta konsehabel pa un otro publikadó studia Beibel ku un yu ku no ta batisá di un famia kristian ku ta asosiá ku e kongregashon. Si nan aprobá e studio, esun ku ta kondusié por raport’é meskos ku kualkier otro studio di Beibel.

Pa instruí yunan den e kamindanan di Yehova ta enserá hopi mas tempu i esfuerso ku bo por mira riba un rapòrt di sirbishi di vèlt. (Deu. 6:6-9; Pro. 22:6) Mester elogiá mayornan kristian pasobra nan ta kumpli ku e responsabilidat pisá aki di lanta nan yunan “den e disiplina i instrukshon di Señor.”—Efe. 6:4.