Kaha di Pregunta

◼ Tur dos mayor por raportá e ora di e estudio di famia?

Maske ta prinsipalmente e tatanan tin e responsabilidat di lanta nan yunan “den e disiplina i instrukshon di Señor,” tur dos mayor ta hunga un ròl den eduká nan yunan. (Efe. 6:⁠4) Beibel ta animá yunan: “Tende e instrukshon di bo tata, i no bandoná e siñansa di bo mama.” (Pro. 1:⁠8) Estudio di famia ta un parti importante di e edukashon ku mayornan tin ku duna nan yunan.

Den pasado, maske tur dos mayor tabata enbolbí den e estudio di famia, ta solamente e mayor ku tabata dirigí e estudio ku e yunan no-batisá tabata konta e ora. Awor ta bin un kambio den esaki. Si tur dos mayor partisipá den e estudio di famia, nan tur dos por konta ún ora maksimalmente pa siman riba nan rapòrt di sirbishi di vèlt. Ta klaru ku mayornan por lo general ta dediká mas ku ún ora pa siman den siña nan yunan. Konstantemente tur dos mayor tin ku hasi esfuerso pa eduká nan yunan. (Deu. 6:​6-⁠9) Sinembargo, e rapòrt di sirbishi di vèlt mester reflehá prinsipalmente loke ta ser lográ den sirbishi. P’esei, asta si e estudio dura mas ku ún ora, ta ser dirigí mas ku un bes pa siman òf ta ser dirigí ku kada yu apart, no mester konta mas ku ún ora pa siman. Ún mayor so lo konta e estudio di famia i ún rebishita pa kada siman ku a dirigí e estudio.