Un Debe Ku Nos Tin pa ku Otro Hende
1 Apòstel Pablo a sinti ku e tabatin e obligashon di prediká na otro hende. E tabata sa ku Yehova a hasi posibel pa tur klase di hende haña salbashon mediante e sanger presioso di Su Yu. (1 Tim. 2:3-6) P’esei, Pablo a bisa: “Mi ta debedó tantu di griego komo di bárbaro, tantu di e sabínan komo di esnan ku no ta sabí.” Ku entusiasmo el a traha diligentemente pa paga e debe ku e tabatin serka su próhimo dor di kompartí e evangelio òf bon nobo ku nan.—Rom. 1:14, 15.
2 Meskos ku Pablo, kristiannan djawe tambe ta buska manera pa kompartí e bon nobo ku nan próhimo na tur oportunidat ku presentá. Dor ku e ‘tribulashon grandi’ ta aserkando rápidamente, ta urgente pa nos buska e hendenan sinsero di kurason. Laga nos amor berdadero pa hende motivá nos pa traha diligentemente den e trabou aki ku ta salba bida.—Mat. 24:21; Eze. 33:8.
3 Kon pa Paga Nos Debe: E manera prinsipal ku nos ta alkansá hende ta dor di prediká di kas pa kas. Den teritorionan kaminda hopi hende no ta na kas, nos lo por drenta den kontakto ku mas hende dor di tene un registro eksakto di e kasnan aki i bolbe na oranan distinto. (1 Kor. 10:33) Nos por alkansá hende tambe dor di duna testimonio den teritorio di negoshi, riba kaya, den parke, riba parkeerplaats i via telefon. Nos por puntra nos mes: ‘Mi ta hasi mi bèst pa partisipá den tur e diferente rasgonan di sirbishi pa asina kompartí e mensahe di bida?’—Mat. 10:11.
4 Un pionero a sinti ku e tabatin un responsabilidat serio di alkansá tur hende den su teritorio. Tabatin un kas ku semper su kortinanan tabata será i ku nunka no tabatin hende. Sin embargo, un dia ku e pionero no tabata den sirbishi, el a ripará ku tabatin un outo pará dilanti di e kas aki kaminda nunka no tabatin hende. Dor ku e no kier a laga e oportunidat aki pasa bai, el a primi bèl na porta. Un hende hòmber a habri, i e promé kòmbersashon a hiba na vários rebishita ku e ruman muhé i su esposo a hasi. Ku tempu e hòmber a aseptá un estudio di Beibel i awor e ta un ruman hòmber batisá. E ta masha gradisidu ku e ruman muhé a sinti ku e tabatin un debe, òf un responsabilidat di prediká na otro hende.
5 Tempu ta kabando, pues awor ta ora pa paga nos debe na nos próhimo dor di hasi esfuerso vigoroso den e trabou di prediká.—2 Kor. 6:1, 2.