Awor Ta Tempu pa Prediká!
1 “Teme Dios i dun’é gloria.” Bou di supervishon di angelnan e mensahe aki ta ser deklará “na tur nashon i tribu i lenga i pueblo.” Dikon? “Pasobra e ora di [Dios] su huisio a yega.” Awe, nos ta bibando den e ‘ora di huisio’ ei ku lo kulminá den destrukshon di e sistema aktual di kosnan. Ta masha importante pa hende “adorá Esun ku a traha shelu i tera i laman i fuentenan di awa.” Ningun otro trabou ku hende ta hasi awe no por ta mas importante òf urgente ku e proklamashon di e evangelio òf ‘bon nobo eterno.’ Sí, awor ta tempu pa prediká!—Rev. 14:6, 7.
2 Durante e último dies añanan, sirbidónan di Yehova a dediká kasi 12 mil mion ora na e trabou di prediká e Reino i hasi disipel. Hopi di nan a hasi kambionan den nan bida pa nan por partisipá mas tantu den e kosecha spiritual. (Mat. 9:37, 38) Aña pasá por ehèmpel, kada luna tabatin un promedio di mas ku 850.000 publikadó ku a sirbi komo pionero. E pioneronan regular mester a dediká un promedio di 70 ora tur luna den e trabou di prediká. Pa e pioneronan ousiliar, e rekisito ta 50 ora.
3 Loke Ta Nesesario pa Traha Pionero: Dor ku pioneronan ta rekonosé ku e ‘tempu ku a keda ta kòrtiku,’ nan ta hasi esfuerso pa mantené nan bida simpel. (1 Kor. 7:29, 31) Nan ta buska maneranan pa redusí nan gastunan pa asina nan por dediká ménos tempu na trabou. Algun di nan por ehèmpel, a bai biba den kasnan mas chikitu. Otronan a deshasí di poseshonnan material innesesario. (Mat. 6:19-21) Hopi bes nan tin ku limitá nan aktividatnan personal tambe. Nan ta hasi tur esaki ku e meta di dediká mas tempu i atenshon na e ministerio. (Efe. 5:15, 16) Ku perseveransia, un spiritu di sakrifisio propio, dependiendo riba Yehova dor di hasi orashon, hopi publikadó por a traha un programa práktiko ku a yuda nan sirbi komo pionero.
4 Abo por sirbi komo pionero? Dikon bo no ta puntra pioneronan eksitoso kiko nan ta hasi pa logra? Traha huntu ku nan den sirbishi di vèlt, i eksperensiá nan goso. Studia artíkulonan tokante e sirbishi di pionero ku a yega di sali den nos publikashonnan. Pone metanan práktiko pa bo mes ku por sirbi komo un trampolin ku ta hiba na e sirbishi di pionero. Si aktualmente tin opstákulonan ku ta stroba bo di sirbi komo pionero, menshoná nan den orashon na Yehova, i pidié yuda bo vense nan.—Pro. 16:3.
5 Bendishon i Goso: E trabou di pionero ta mehorá nos abilidat di usa e Palabra di Dios, i esaki na su turno ta oumentá nos goso. Un ruman muhé hóben pionero a remarká: “Un berdadero bendishon ta e abilidat di por manehá e Palabra di Dios korektamente. Ora bo ta traha pionero, bo ta usa bo Beibel masha hopi. Awor ora mi ta bai di kas pa kas, mi por kòrda tekstonan bíbliko ku ta pas pa kada doño di kas.”—2 Tim. 2:15.
6 Tambe e sirbishi di pionero ta siña nos hopi abilidat balioso ku por mehorá nos bida. E por yuda hóbennan siña kon pa parti nan tempu na un manera sabí, kon pa manehá plaka i kon pa trata ku otro hende. Hopi ruman ta kuminsá mira bida for di un punto di bista mas spiritual debí ku nan ta traha pionero. (Efe. 4:13) Ademas, hopi bes pioneronan tin e privilegio di mira kon Yehova su man ta obra na nan fabor.—Echo. 11:21; Fil. 4:11-13, NW.
7 Kisas un di e bendishonnan di mas grandi di e sirbishi di pionero ta ku e ta yuda nos hala serka Yehova. Esaki por sostené nos ora nos haña nos ku prueba. Un ruman muhé ku a perseverá durante un periodo di difikultat severo, a bisa: “E relashon estrecho ku Yehova ku mi a kultivá dor di traha pionero, a yuda mi soportá tur mi problemanan.” El a agregá: “Mi ta sinti mi masha felis ku mi a pasa mi bida komo adulto sirbiendo Yehova den e trabou di tempu kompletu. Esaki a hasi posibel ku mi por a duna di mi mes den maneranan ku nunka mi a pensa ku lo mi tabata por.” (Echo. 20:35) Laga nos tambe eksperensiá bendishonnan riku segun ku nos ta hasi nos máksimo esfuerso den e trabou sumamente importante aki di prediká.—Pro. 10:22.
[Study Questions]
1. Dikon awor ta tempu pa prediká?
2. Kon sirbidónan di Yehova ta demostrá ku nan ta rekonosé ku nos ta bibando den un tempu urgente?
3. Ki kambionan publikadónan ta hasi hopi bes pa nan por sirbi komo pionero?
4. Ki pasonan práktiko bo por dal pa yuda bo alkansá e meta pa sirbi komo pionero?
5. Kon e trabou di pionero ta yuda nos mehorá nos abilidatnan den e ministerio?
6. Kiko e sirbishi di pionero ta siña nos?
7. Kon e trabou di pionero ta yuda nos hala serka Yehova?