Bo Por Drenta “un Porta Hanchu” Ku Ta Hiba na Aktividat?
1 Ora “un porta hanchu” ku ta hiba na aktividat a habri pa apòstel Pablo, yen di entusiasmo el a probechá di e oportunidat pa promové interesnan di Reino ounke el a hañ’é ku hopi opositor. (1 Kor. 16:9) Awe rònt mundu tin mas o ménos 642.000 publikadó di Reino ku a drenta un porta hanchu di aktividat birando pionero regular.
2 Sirkunstansianan Ta Kambia: Ounke aktualmente nos sirkunstansia personal kisas ta limitá nos aktividat, sirkunstansianan sa kambia. P’esei ta bon pa tempu-tempu nos evaluá nos situashon i no sinta warda pa un situashon ideal presentá. (Ekl. 11:4) Bo ta un hóben ku ta serka di kaba skol sekundario? Bo ta un mayor i bo yunan ta bai kuminsá skol un bes aki? Bo ta serka di baha ku penshon? Podisé e kambionan ei lo por duna bo mas tempu liber ku ta permití bo drenta e sirbishi di pionero regular. Un ruman muhé ku anteriormente tabatin problema ku salú a disidí di kuminsá traha komo pionero ora e tabatin 89 aña di edat. Kon bin? A pasa mas ku un aña ku e no tabatin nodi bai drumi den hospital i el a pensa ku su salú lo a permitié traha pionero.
3 Den e kaso di Pablo, su intenshon original tabata pa bai bishitá su rumannan na Korinto. Pero el a ahustá su plannan pa kousa di e bon nobo. Hopi ruman ku ta pionero regular awe mester a hasi vários kambio pa nan por hasi e trabou ei. Algun di nan a simplifiká nan bida, redusiendo nan gastunan, di tal manera ku un trabou partaim mes ta sufisiente pa kubri esakinan. Nan privilegio di sirbishi ta duna nan goso. (1 Tim. 6:6-8) Algun pareha kasá a hasi kambionan ku ta permití nan biba ku entrada di e esposo so di tal manera ku e esposa por traha pionero.
4 No sea lihé pa deskartá e idea di traha pionero pensando ku bo no por alkansá e kantidat di ora ku esei ta rekerí. Pa bo alkans’é bo tin ku traha djis algu mas ku dos ora pa dia. Si bo no ta sigur ku bo por logr’é, purba traha pionero ousiliar un òf dos luna pero ku e meta personal di alkansá 70 ora. Esaki lo duna bo e oportunidat di eksperensiá e goso ku e trabou di pionero ta trese kuné. (Sal. 34:8) Papia ku rumannan ku ta traha pionero aktualmente. Podisé nan a vense e mesun tipo di opstákulonan ku abo ta konfrontá. (Pro. 15:22) Pidi Yehova bendishoná bo esfuersonan pa ekspandé bo ministerio.—1 Juan 5:14.
5 Un Meta Ku Ta Bale La Pena: Ora bo ta sirbi komo pionero regular bo ta haña hopi bendishon. Esaki ta permití bo eksperensiá e mayor felisidat ku bo ta haña ora bo ta duna mas. (Echo. 20:35) E trabou di pionero lo mehorá bo abilidat di manehá Dios su Palabra di bèrdat korektamente. (2 Tim. 2:15) E ta duna bo mas oportunidat pa eksperensiá kon Yehova ta saka su man pa yuda bo. (Echo. 11:21; Fil. 4:11-13, NW ) Ademas, e trabou di pionero lo yuda bo hala mas serka Yehova i desaroyá kualidatnan spiritual manera awante. (Sant. 4:8) Abo por drenta e porta hanchu aki di aktividat i bira pionero regular?
[Study Questions]
1. Kua “porta hanchu” ku ta hiba na aktividat ta habrí pa nos?
2. Dikon ta bon pa tempu-tempu nos evaluá nos situashon?
3. Ki ahustenan algun ruman a hasi pa nan traha komo pionero regular?
4. Kiko nos por hasi si nos ta duda ku nos lo por kumpli ku e rekisito di ora?
5. Dikon e trabou di pionero regular ta un meta ku ta bale la pena?