Programa Nobo pa Dia Spesial di Asamblea

Wowo ta un diseño maravioso. (Sal. 139:14) Sin embargo, ta riba un kos so e por enfoká a la bes. Esei ta sierto tantu den sentido literal komo den sentido figurativo. Pa nos por mantené un bista spiritual kla i skèrpi, nos tin ku konsentrá nos atenshon riba hasimentu di Dios su boluntat. En bista di e distraishonnan di e mundu di Satanas ku ta oumentando awor mas ku nunka, ta mashá na su lugá ku e programa pa dia spesial di asamblea pa aña di sirbishi 2006 lo desaroyá e tema “Mantené Bo Wowo Simpel.”—Mat. 6:22, NW.

Kiko nos por hasi pa risibí bendishon for di Yehova? (Pro. 10:22) Lo trata e pregunta aki den e parti “Mantené un Wowo Simpel i Kosechá Bendishon.” Entrevistanan lo resaltá kon nos por benefisiá dor di apliká prinsipionan bíbliko. E promé diskurso na enkargo di e oradó bishitante, “Mantené un Wowo Simpel den un Mundu Malbado,” lo spièrta nos di kosnan ku por kompliká nos bida i tiki-tiki stroba nos di krese spiritualmente. Tambe nos lo siña kiko skohe “e parti bon” ta enserá.—Luk. 10:42.

Kon mayornan i otro rumannan por animá hóbennan kristian pa enfoká riba aktividatnan spiritual? Den e partinan “Mayornan Ku Ta Mek Nan Flecha Bon” i “Hóbennan Ku Ta Hasi Esfuerso pa Alkansá Metanan Spiritual,” lo tin mayor- i hóbennan ku lo komentá riba e pregunta importante ei. (Sal. 127:4) E último diskurso ku lo ta na enkargo di e oradó bishitante lo konsiderá kon nos por keda pareu ku Yehova su organisashon komo persona individual, komo famia i komo kongregashon.

Sea ku ta resientemente nos a konosé e bèrdat òf nos tin hopi dékada ta sirbi Yehova, ta masha importante pa nos ‘mantené nos wowo simpel.’ I e programa pa dia spesial di asamblea lo yuda nos hasi nèt esei.