Programa Nobo pa Dia Spesial di Asamblea

Si nos mira òf tende un señal di spièrtamentu i tòg no ta reakshoná i aktua, e resultadonan por ta desastroso. I den kaso di guia spiritual ku Yehova ta duna, ta asta mas importante ainda pa nos reakshoná i aktua. P’esei, esaki lo ser enfatisá durante e programa di e dia spesial di asamblea durante e binidero aña di sirbishi. E tema ta: “Pone Bon Atenshon Kon Boso Ta Skucha.”—Luk. 8:18.

Den su promé diskurso e oradó bishitante lo konsiderá kon e konseho den e promé kapítulonan di Pablo su karta inspirá na e hebreonan ta apliká na nos awe. Den e diskurso final, “Presta Atenshon Konstante na Instrukshon Divino,” lo e yuda tur presente analisá si nan di bèrdat ta skuchando Yehova, su Yu i “e esklabo fiel i prudente.”—Mat. 24:45.

Vários parti riba e programa lo ta di benefisio spesialmente pa famianan. E diskurso “Famianan Ku Ta Skucha e Palabra di Dios sin Distraishon,” lo yuda nos evitá ku kosnan di mundu ta stroba nos di krese spiritualmente. Durante e parti aki lo tin entrevista ku rumannan ku a hasi kambio pa pone kosnan spiritual na promé lugá. Den e diskurso “Kon Skuchamentu Atento na e Palabra di Dios Ta Fortifiká Nos Hóbennan,” lo tin entrevista ku hóbennan ku a mustra lealtat na e bèrdat na skol, dilanti nan pareunan òf den sirbishi. E parti “Chikitinnan Ku Ta Skucha Dios i Siña” lo yuda nos pa no balotá e abilidat di siña di e chikitinnan. Entrevista ku muchanan chikitu i nan mayornan lo yuda nos mira e benefisio di eduká mucha for di infansia den e kamindanan di Yehova.

Miéntras ku Satanas “ta gaña henter mundu,” Yehova sí ta mustra su fiel sirbidónan e manera ku nan mester kana. (Rev. 12:9; Isa. 30:21) Si nos skucha su konseho ku atenshon i obedientemente aplik’é den nos bida, nos ta bira sabí i felis, i nos ta haña bida eterno den futuro.—Pro. 8:32-35.