Un Testimonio sin Palabra
1 Sin ekspresá un pia di palabra, Yehova su kreashon físiko ta bisa masha hopi tokante Su kualidatnan invisibel. (Sal. 19:1-3; Rom. 1:20) Asina tambe, nos kondukta ekselente, kualidatnan kristian i aparensia modesto ta duna testimonio sin palabra. (1 Ped. 2:12; 3:1-4) Nos tur mester tin e deseo di “dòrna e doktrina di Dios nos Salbadó den tur kos” na e manera ku nos ta komportá nos mes.—Tito 2:10.
2 Kon hende imperfekto por hasi e siñansanan di Beibel mas atraktivo? Esaki ta posibel solamente mediante e guia di e Palabra di Dios i e poder di spiritu santu. (Sal. 119:105; 143:10) Dios su palabra “ta bibu i aktivo i mas skèrpi ku kualke spada di dos filo.” (Heb. 4:12) E ta penetrá te den nos paden i ta yuda nos bisti e hende, òf personalidat, nobo. (Kol. 3:9, 10) Spiritu santu ta produsí kualidatnan deseabel den nos, manera kariño, bondat, mansedumbre òf suavedat, i dominio propio. (Gal. 5:22, 23) Nos kada un individualmente ta permití Dios su palabra i su spiritu influensiá nos bida?—Efe. 4:30; 1 Tes. 2:13.
3 Otro Hende Ta Ripará: Otro hende ta ripará ora nos ta biba segun e normanan di Yehova i ta hasi esfuerso pa reflehá su kualidatnan. Tuma por ehèmpel e kaso di un hòmber kende su koleganan di trabou tabata tenta pasobra e ta kòrtiku. Un ruman muhé sí ku tabata traha den e mesun ofisina semper a trat’é ku dignidat i rèspèt. Esaki a motivá e hòmber pa puntr’é dikon e tabata asina diferente. E ruman a splika ku su kondukta respetuoso ta debí ku e ta apliká prinsipionan bíbliko den su bida. Tambe e ruman a kont’é di e maravioso speransa di Reino. E hòmber a kuminsá studia Beibel i ku tempu el a progresá te ku el a batisá. Ora el a regresá su pais natal, su famianan a keda impreshoná ku su kondukta ekselente, i vários di nan tambe a aseptá e bèrdat.
4 Sea ta na trabou, na skol òf ora nos ta trata ku famia- i bisiñanan, nos por motivá otro hende pa duna gloria na Dios mediante nos kondukta ekselente huntu ku nos predikashon.—Mat. 5:16.