Konta di Yehova Su Gloria
1 E salmista a deklará: “Kanta na SEÑOR, henter mundu. . . . Konta di su gloria meimei di e nashonnan, su echonan maravioso meimei di tur e pueblonan.” Segun ku nos ta meditá riba loke Yehova a hasi, ta hasi i ainda lo hasi pa nos, nos kurason ta motivá nos pa konta di su gloria!—Sal. 96:1, 3.
2 Den Nos Ministerio: Testigunan di Yehova tin e privilegio di karga Dios su nòmber i di alab’é públikamente rònt e tera. (Mal. 1:11) Ta ki un kontraste ku klero di kristiandat ku di un manera arogante a kita e nòmber di Dios for di nan tradukshonnan di Beibel! E trabou di hasi e nòmber di Dios konosí ta urgente, pasobra ta e nòmber ei hende tin ku invoká pa nan por ser salbá atraves di e binidero tribulashon grandi. (Rom. 10:13-15) Ademas, pas universal, inkluso pas entre e habitantenan di tera, ta dependé di e santifikashon di e nòmber di Dios. Sí, tur Dios su obranan ta konektá ku su nòmber.
3 Yehova “ta grandi, i digno di ser alabá na gran manera.” Pero pa hende por “atribuí na SEÑOR e gloria debí na su nòmber,” nan tin ku sa e bèrdat tokante dje. (Sal. 96:4, 8) Sin embargo, tin hende ku ta nenga ku Dios ta eksistí. (Sal. 14:1) Otronan ta papia malu di dje bisando ku e no tin poder, òf nan ta pretendé ku e no ta interesá den asuntunan di humanidat. Segun ku nos ta yuda hende di kurason onrado gana konosementu eksakto di nos Kreadó, su propósito i su personalidat atraktivo, nos ta glorifiká Yehova.
4 Mediante Nos Kondukta: Ora nos ta biba na armonia ku Yehova su normanan hustu, nos ta duna onor na dje. Otro hende ta mira nos bon kondukta. (1 Ped. 2:12) Por ehèmpel, nos aparensia personal limpi i nèchi lo por stimulá otro hende pa elogiá nos, i esei ta duna nos e oportunidat pa papia tokante e benefisionan di biba di akuerdo ku e prinsipionan ku nos ta haña den e Palabra di Dios. (1 Tim. 2:9, 10) Nos ta keda masha kontentu ora otronan ta ‘mira nos bon obranan i ta glorifiká nos Tata ku ta den shelu’!—Mat. 5:16.
5 Laga nos alabá nos magnífiko Dios tur dia, ku echo i palabra. Asina nos ta duna oido na e yamada gososo: “Kanta na SEÑOR, bendishoná su nòmber; proklamá e bon nobo di su salbashon dia tras dia.”—Sal. 96:2.