Mustra Interes Personal—Dor di Ser un Bon Opservadó
1 Yehova Dios i Kristu Hesus ta sobresalí den e manera ku nan ta identifiká nesesidatnan spesífiko di hende i ta yuda nan. (2 Kró. 16:9; Mar. 6:34) Ta ora nos identifiká òf diserní kiko ta e interes- i preokupashonnan di e personanan ku nos ta topa den nos ministerio, nos lo por adaptá nos presentashon di e bon nobo di akuerdo ku eseinan.
2 Sea Atento pa Detaye: Hesus tabata un bon opservadó. (Mar. 12:41-43; Luk. 19:1-6) Asina tambe, si nos ta tuma nota di dekorashonnan religioso, lemanan riba outo òf ko’i hunga den kurá ora nos ta aserkando un kas, nos lo por krea un oportunidat pa duna testimonio efikas di e bon nobo.
3 Un persona su ekspreshon di kara i su komportashon lo por indiká algu tokante su sintimentunan. (Pro. 15:13) Podisé e pèrdida di un ser kerí òf un otro situashon doloroso ta pone ku e tin mester di konsuelo. Kisas lo e apresiá si bo kompartí algun teksto di Beibel apropiá kuné. (Pro. 16:24) E doño di kas ta purá pa sali òf e tin un beibi ku ta yora den su brasa? Si esei ta e kaso, kisas ta mihó pa hasi areglo pa pasa na un otro okashon. Dor di mustra konsiderashon i “kompashon,” nos lo por motivá e persona pa skucha ora nos bolbe.—1 Ped. 3:8.
4 Adaptá Bo Komentarionan: Apòstel Pablo a opservá ku e stat di Atenas tabatin un altar dediká “Na un Dios Deskonosí.” Esaki a influensiá e manera ku el a presentá e bon nobo, pasobra el a bisa: “Loke boso ta adorá den ignoransia, esei mi ta proklamá na boso.” Pablo su método ku takto a motivá algun di esnan ku tabata presente pa pensa riba e mensahe di Reino i bira kreyente.—Echo. 17:23, 34.
5 Di mes manera, si nos ta bon opservadó, esei ta yuda nos diserní kiko ta e interesnan di un persona i asina nos por adaptá nos presentashon. Hasi preguntanan ku lo por animá e doño di kas pa ekspresá su mes. Pensa riba tekstonan ku lo bo por usa pa oumentá su interes. (Pro. 20:5) Dor di ser un bon opservadó i mustra interes personal sinsero den otro hende, nos lo ta den e mihó kondishon pa kompartí e bon nobo ábilmente.