Loke Nos Ministerio Ta Logra
1 E Palabra di Dios ta deskribí kristiannan ta marcha triunfantemente den sirbishi di Yehova; ta komo si fuera nan ta den un marcha di viktoria. (2 Kor. 2:14-16) Segun ku nos ta yuda otro hende haña e konosementu di Dios, nos ofrendanan di sirbishi ta manera sensia ku ta agradá Yehova. Tin hende ku ta wòrdu atraí dor di e dulsura di e bon nobo; tin otronan ku ta rechas’é. Pero e reakshon negativo di mayoria di hende no ta nifiká ku nos trabou no ta duna resultado. Wak kiko nos ministerio ta logra.
2 Engrandesé Yehova: Satanas ta pretendé ku hende ta sirbi Yehova pa motibunan egoista. (Jòb 1:9-11) E ministerio kristian ta duna nos un oportunidat pa demostrá ku nos deboshon na Dios ta berdadero. Hopi publikadó ta sigui obedesé e mandamentu pa prediká i hasi disipel apesar di sirkunstansianan personal difísil òf e indiferensia di hende en general. Tal perseveransia leal ta hasi Yehova su kurason kontentu!—Pro. 27:11.
3 Ademas, nos ministerio ta hunga un papel importante tambe den e kumplimentu di Dios su propósito. Relashoná ku e binidero destrukshon di e mundu di Satanas, Yehova a bisa: “E nashonnan lo sa ku ami ta [“Yehova,” NW].” (Eze. 39:7) Pa e nashonnan por sa esaki, ta masha importante pa Dios su sirbidónan sigui deklará su nòmber i propósito “na tur nashon i tribu i lenga i pueblo.”—Rev. 14:6, 7.
4 Base pa Huisio: E predikashon di e bon nobo ta sirbi tambe komo un base pa huisio. Apòstel Pablo a deklará ku Kristu Hesus lo trese vengansa riba ‘esnan ku no konosé Dios i esnan ku no ta obedesé e evangelio di nos Señor Hesus.’ (2 Tes. 1:8, 9) Lo husga hende a base di nan reakshon riba e evangelio òf bon nobo. Esaki ta pone un responsabilidat serio riba Dios su sirbidónan! Pa evitá ku nos ta bira kulpabel di sanger, nos no mester laga nada stroba nos di deklará e mensahe di Reino ku ta salba bida.—Echo. 20:26, 27.
5 Nos esfuersonan kontinuo pa yuda nos próhimo gana Dios su aprobashon ta un ekspreshon di Yehova su miserikòrdia. (1 Tim. 2:3, 4) Sabiendo ku konstantemente bida di hende ta kambia, nos ta bai bes tras bes serka nan i ta urgi nan pa buska Yehova miéntras ku tin tempu ainda. Dor di hasi esei nos ta reflehá “e miserikòrdia tierno di nos Dios” ku “no kier pa ningun hende bai pèrdí, ma pa tur bin na repentimentu.”—Luk. 1:78; 2 Ped. 3:9.
6 Benefisio pa Nos: Ora nos ta keda aktivo den e sirbishi di Yehova, esaki ta sirbi komo un protekshon pa nos. E ta yuda nos keda ‘tene bon na mente e presensia di e dia di Yehova’ i evitá di mancha nos mes ku e mal sistema di kosnan aktual. (2 Ped. 3:11-14; Tito 2:11, 12) P’esei anto, laga nos ta “firme, konstante, semper abundando den e trabou di Señor,” sabiendo ku e esfuersonan ku nos ta hasi den e ministerio kristian no ta en bano.—1 Kor. 15:58.
[Study Questions]
1. Kon Yehova ta konsiderá nos ministerio, i kiko ta e reakshon di hende?
2. Kiko nos por demostrá mediante nos ministerio?
3. Dikon ta hopi importante pa nos sigui deklará Dios su nòmber i propósito na hende?
4. Den ki sentido e trabou di prediká ta sirbi komo un base pa huisio?
5. Kon nos ministerio ta reflehá Dios su miserikòrdia?
6. Kon e echo ku nos ta keda aktivo den e sirbishi di Yehova ta benefisiá nos?