Kon Nos Por Yuda?
1 “Kon nos por yuda?,” ta un pregunta ku hopi bes Testigunan di Yehova ta hasi ora nan tende di un desaster ku a sosodé den sierto parti di mundu. Manera e relato na Echonan 11:27-30 ta mustra, kristiannan den promé siglo a perkurá yudansa pa nan rumannan ku tabata biba na Hudea dor ku tabatin skarsedat di kuminda einan.
2 Den nos tempu, e statutonan di nos organisashon ta permití nos usa plaka pa obranan karitativo i pa duna yudansa humanitario na hende ku ta sufri dor di desasternan natural òf desaster kousá dor di hende, òf ora tin otro nesesidat.
3 Aña pasá, por ehèmpel, hopi ruman a kontribuí pa yuda esnan ku a keda afektá pa e tsunami desastroso na Sur Asia. E manera sinsero aki ku nan a reakshoná dor di hasi donashonnan pa e fondonan di ousilio di e organisashon a wòrdu apresiá mashá. Sin embargo, ora un persona hasi un donashon spesífikamente pa un sierto desaster, algun pais ta rekerí pa usa e fondonan aki solamente pa e propósito ku e donante a spesifiká i denter di un sierto periodo di tempu, sea ku lokalmente a perkurá p’e nesesidatnan di e rumannan òf nò.
4 P’esei anto, ta rekomendabel pa hasi donashonnan pa perkurá alivio i yudansa humanitario, na e obra mundial. Ta usa e fondo aki den esfuersonan pa duna alivio i tambe pa perkurá p’e nesesidat spiritual di e hermandat kristian. Pero si pa un òf otro motibu un persona ta deseá di hasi un donashon pa perkurá alivio apart for di e kontribushon pa e obra mundial, lo asept’é tòg i us’é ki ora ku tin un nesesidat pa duna alivio. Sin embargo, nos lo apresiá si hasi e donashonnan ei sin spesifiká na unda i kon lo por usa e fondonan aki.
5 E echo ku nos ta hasi donashon prinsipalmente na e obra mundial, ta hasi posibel ku tin mas fondo disponibel pa usa relashoná ku tur rasgo di e obra di Reino, i no tin nodi reservá nan pa usa solamente ora tin un nesesidat di alivio den futuro. Esaki ta na armonia ku e spiritu tras di e teksto na Efesionan 4:16, esta, ku nos ta traha huntu pa duna loke ta nesesario pa “e kresementu di e kurpa pa edifikashon di su mes den amor.”