Kon pa Yuda Despues di un Desaster Natural

Awe nos ta mira mas i mas desaster natural. Ora un desaster natural tuma lugá, e yudansa ku ta ser duná mester ta bon organisá i koordiná. Pa e motibu ei, Kuerpo Gobernante a hasi areglo pa forma un Departamento di Duna Ousilio na kada ofisina di sukursal.

Ora e ruman hòmbernan den e departamento ei haña sa ku un desaster natural a tuma lugá, mesora nan ta tuma kontakto ku e ansianonan lokal pa haña sa ki yudansa e publikadónan lo tin mester. Si e daño ta asina tantu ku e publikadónan lokal mes no por trata ku e situashon, sukursal lo asigná ruman hòmber kualifiká pa guia e rumannan den e trabou di duna ousilio. E ruman hòmbernan ei por pidi pa boluntario òf pa donashon di kos spesífiko òf nan por kumpra i distribuí e materialnan ku nan tin mester lokalmente.

E manera koordiná akí di trata ku desaster natural tin hopi bentaha. Esei ta evitá trabou innesesario, konfushon i gastamentu di plaka i material ku por tuma lugá ora algun ruman purba di yuda riba nan mes.

E ruman hòmbernan asigná pa sukursal por determiná kuantu plaka i boluntario tin mester pa duna ousilio. Ademas, nan por sera konosí ku funshonario lokal ku hopi bes por yuda e trabou di duna ousilio tuma lugá mas lihé. P’esei, abo mes no mester tuma inisiativa pa kolektá fondo, manda material òf bai na e área afektá a lo ménos ku e rumannan asigná puntra bo pa hasi esei.

Ora un desaster natural tuma lugá, nos ke yuda. (Heb 13:16) Nos ta stima nos rumannan! Pues, kiko nos por hasi? Nos por hasi orashon pa e víktimanan di e desaster natural i pa e rumannan ku ta duna ousilio. Esei ta e kos di mas importante ku nos por hasi. Ademas, nos por hasi donashon na e obra mundial. Bou di guia di Kuerpo Gobernante, e ofisinanan di sukursal por disidí kon ta e mihó manera pa usa e donashonnan akí. I si nos ta deseá di yuda personalmente, nos por indiká esei ora nos yena e formulario (DC-50) pa apliká pa e programa di Diseño i Konstrukshon Lokal.

WAK E VIDIO INUNDASHON DEVASTADOR NA BRAZIL, I DESPUES HASI E SIGUIENTE PREGUNTA:

Kiko a impreshoná bo di e trabou di duna ousilio di e Testigunan di Yehova despues di e inundashon na Brazil na aña 2020?