“Sigui Mi Kontinuamente”
1 Ounke hopi hende ta buska solamente nan satisfakshon personal den bida, tòg mayoria bes nan ta infelis. Di otro banda, manera Hesus a rekomendá, dunamentu di un manera inegoista ta trese berdadero felisidat. (Echo. 20:35) El a bisa: “Si un hende kier sigui mi, lag’é nenga su mes, . . . i sigui mi [“kontinuamente,” NW].” (Mar. 8:34) Esaki ta enserá mas ku djis nenga nos mes di sierto plasernan de bes en kuando. E ta nifiká biba kada dia pa agradá Yehova, i no nos mes.—Rom. 14:8; 15:3.
2 Pensa riba e ehèmpel di apòstel Pablo. Debí na “e balor superior di konosé Kristu Hesus,” Pablo a laga su ambishonnan personal un banda i a dediká su mes na e trabou di promové interesnan di Reino. (Fil. 3:7, 8) El a bisa: “Gustosamente lo mi gasta loke mi tin i duna mi mes” pa sirbi otronan. (2 Kor. 12:15) Ta bon pa kada un di nos puntra nos mes: ‘Kon mi ta usando mi tempu, energia, abilidat- i rekursonan? Mi empeño prinsipal ta pa promové mi propio interesnan, òf mi ta trata di agradá Yehova?’
3 Oportunidatnan pa Duna: Tur aña e pueblo di Dios ta dediká mas ku mil mion ora na un trabou ku ta salba bida, esta, e predikashon di e Reino. Den e kongregashon tantu hóben komo bieu ta kumpli ku vários asignashon ku ta benefisiá otronan. Ademas, rumannan ta hasi hopi trabou en konekshon ku asamblea- i kongresonan, i tambe den konstrukshon i mantenshon di edifisionan ku ta ser usá pa promové adorashon berdadero. I pensa riba e servisio amoroso ku ruman hòmbernan ku ta sirbi den Komiténan di Kontakto ku Hospital i Gruponan di Bishitá Pashènt ta brinda. E esfuersonan apnegá aki ta un bendishon pa nos hermandat kristian!—Sal. 110:3.
4 Oportunidatnan pa duna di nos mes den vários manera por presentá den situashonnan di emergensia òf desaster. Sin embargo, fuera di e okashonnan ei, hopi bes nos por simplemente komprondé ku un ruman kristian tin mester di yudansa òf animashon. (Pro. 17:17) Ora nos ta kla pa hasi esfuerso pa sirbi otro hende i promové interesnan di Reino, nos ta siguiendo e ehèmpel di Hesus. (Fil. 2:5-8) Laga nos hasi nos bèst pa hasi esei kontinuamente.