Mustra Interes Personal—Dor di Ser Bondadoso i Kortes
1 Ounke Yehova ta e Soberano Universal, e ta bondadoso, kortes i ta mustra konsiderashon ora e ta trata ku hende imperfekto. (Gén. 13:14, NW; 19:18-21, 29) Nos por mehorá nos presentashon di e bon nobo dor di imitá nos Dios bondadoso i kortes. (Kol. 4:6) Esaki ta enserá mas ku djis mustra bon manera i rèspèt ora nos ta papia ku otro hende.
2 Di Kas pa Kas: Kiko nos mester hasi ora nos yama na un kas na un ora inoportuno òf ora ku e doño di kas ta muchu okupá pa papia ku nos? Ta bon pa nos tene kuenta ku e sirkunstansianan ei i purba di hasi un presentashon breve, òf puntra e persona si nos por bolbe bèk na un otro ora. Si e persona no ke nos literatura, nos ta keda kariñoso i no ta insistí pa e aseptá nan. Konsiderashon pa ku otro hende lo motivá nos tambe pa mustra rèspèt pa nan propiedat dor di, por ehèmpel, sera nan porta di kurá i siña nos yunan pa hasi meskos. Nos mester hasi sigur pa kualke literatura ku nos laga kaminda no tin hende na kas, ta for di bista públiko. Sí, bondat i kortesia lo motivá nos pa trata otro hende manera nos ke pa nan trata nos.—Luk. 6:31.
3 Predikando Riba Kaya: Ora nos ta prediká riba kaya, nos por mustra kortesia dor di no stroba hende na pia di pasa i no aglomerá dilanti negoshinan. Ta bon pa tene kuenta ku sirkunstansia di otro hende i lo trata di papia solamente ku hendenan ku podisé tin algun minüt i no ku esnan ku nos por mira bon kla ku nan tin purá. Tin bes nos tin ku papia duru pa hende por tende nos apesar di e bochincha ku tin riba kaya. Pero nos mester hasi esaki na un manera digno pa no hala atenshon na nos mes.—Mat. 12:19.
4 Ora di Prediká via Telefòn: Konsiderashon ku otro hende lo motivá nos pa prediká via telefòn na un sitio kaminda no tin bochincha den background. Nos ta mustra ku nos tin bon manera ora nos ta identifiká nos mes mesora i ta splika e motibu di nos yamada. Dor di papia direktamente den e bosina i mantené un tono amigabel, nos tin mas chèns di enbolbé un persona den un kòmbersashon edifikante basá riba Beibel. (1 Kor. 14:8, 9) Komo personanan bondadoso, kortes i ku ta mustra konsiderashon den e vários maneranan aki, nos ta imitá Yehova nos Dios, kende ta bondadoso i kortes.