Ku Kurashi, Pero Pasífiko
1 Hopi hende ku nos ta prediká na dje ta papia sinseramente di siñansanan ku no ta kuadra ku bèrdat bíbliko. Ounke nos ta prediká ku kurashi, nos tin e deseo tambe di ta “na pas ku tur hende” i p’esei nos ta evitá di ofendé nan innesesariamente. (Rom. 12:18; Echo. 4:29, NW) Kon nos por presentá e mensahe di Reino ku kurashi i tòg ser pasífiko?
2 Buska un Base Komun: Un persona pasífiko ta evitá diskushon. Si nos ta refutá sin ta na nodi loke un doño di kas ta kere firmemente, nos ta strob’é di habri su mes pa skucha nos mensahe. Si e bisa algu robes, podisé ku takto nos por introdusí un punto riba kua nos tur dos ta di akuerdo. Enfatisando loke nos tin en komun, nos lo por eliminá kualke sintimentu negativo i alkansá su kurason.
3 Nos ta debilitá òf bai kontra e bèrdat si nos pasa por alto di un punto di bista robes di un doño di kas? Nò. Nos tarea komo ministernan kristian no ta pa refutá kada idea robes ku nos enkontrá, sino pa prediká e bon nobo di e Reino di Dios. (Mat. 24:14) En bes di bula reakshoná ora nos tende un punto di bista robes, nos por konsider’é komo un manera pa haña sa kon e persona ta pensa.—Pro. 16:23.
4 Trata Hende ku Dignidat: Tin okashonnan ku nos mester tin kurashi pa refutá siñansanan robes. Sin embargo, komo personanan pasífiko, nos no ta ridikulisá ni usa palabranan ofensivo pa deskribí hende ku ta kere siñansa robes i ta siña esaki na otro hende. Un aire di superioridat ta alehá hende for di nos, miéntras ku un aktitut humilde i amabel ta habri mente di hende ku ta stima bèrdat. Nos oyentenan ta keda ku nan dignidat ora nos mustra rèspèt pa nan i nan kreensianan, i esei ta pone ku ta bira mas fásil pa nan aseptá nos mensahe.
5 Apòstel Pablo a tene kuenta ku e kreensianan di e personanan ku el a prediká na dje i el a hasi esfuerso pa presentá e bon nobo na un manera ku a atraé nan kurason. (Echo. 17:22-31) Boluntariamente el a bira “tur kos pa tur hende,” pa ‘di tur manera e por a salba algun.’ (1 Kor. 9:22) Nos tambe por hasi meskos ora nos ta pasífiko segun ku nos ta prediká e bon nobo ku kurashi.