Un Disposishon Boluntario Ta Trese Bendishon
1 Ora Goliat a reta e ehérsito di Israel, kualke un di e sòldánan por a bringa kuné. Pero tabata un mucha hòmber wardadó di karné, sin entrenamentu di guera, ku a ofresé su mes. (1 Sam. 17:32) Ora e hudiunan eksiliá a regresá Yerusalèm, pero no por a rekonstruí e murayanan, tabata e kopero di e rei di Persia ku a ofresé pa bandoná su puesto di onor den e palasio i biaha bai Yerusalèm pa organisá e trabou. (Neh. 2:5) Yehova a bendishoná tur e dos hòmbernan aki, David i Nehemias, pa e disposishon ku nan a demostrá.—1 Sam. 17:45, 50; Neh. 6:15, 16.
2 Den e mundu djawe masha poko hende tin un disposishon boluntario. Den e “último dianan” aki, hende su bida ta masha drùk, i hopi di nan ta “stimadó di nan mes.” (2 Tim. 3:1, 2) Ta fásil pa un persona keda asina okupá ku su interesnan personal, ku e ta pasa por haltu e oportunidatnan pa ofresé su mes pa yuda otro hende ora tin mester. Sin embargo, komo kristiannan, nos ke imitá Hesus, kende a tuma inisiativa pa yuda otro hende. (Juan 5:5-9; 13:12-15; 1 Ped. 2:21) Kon nos por demostrá un disposishon boluntario, i ki bendishonnan nos lo risibí?
3 Na Fabor di Nos Rumannan: Un manera ku nos por kompartí un “don spiritual” ku otro hende ta di duna komentario den partinan di reunion ku ta rekerí partisipashon di esnan presente. (Rom. 1:11) Nos komentarionan ta onra Yehova, nan ta imprimí e bèrdat mas firme den nos mente i kurason i nan ta hasi e reunionnan mas plasentero. (Sal. 26:12) Ademas, nos por ofresé pa duna parti den e Skol di Ministerio Teokrátiko ora tin mester di boluntario. Esaki lo yuda nos mehorá nos kapasidat di siña otro hende.
4 Ruman hòmbernan por demostrá nan disponibilidat pa sirbi hasiendo esfuerso pa haña responsabilidatnan den e kongregashon. (Isa. 32:2; 1 Tim. 3:1) Nos tur por yuda pa kosnan kana bon na asamblea- i kongresonan ora nos ta ofresé nos mes pa traha den e vários departamentonan. Ora nos ofresé pa traha huntu ku e superintendente di sirkuito den sirbishi òf ofresé pa e kome ku nos, esaki ta resultá den “un interkambio di estímulo.” (Rom. 1:12, NW) Ora nos duna yudansa práktiko na huérfano, biuda, hende enfermo, mama ku yu chikí i otronan den e kongregashon, nos ta haña goso i Yehova su aprobashon.—Pro. 19:17; Echo. 20:35.
5 Un otro manera ku nos por duna di nos tempu i energia ta ora nos ta yuda limpia i mantené e Salòn di Reino den bon kondishon. Ademas, tin mester di mas i mas Salòn di Reino nobo i boluntario pa traha nan ya ku tin hopi hende ta drentando e bèrdat. Un pareha a pone nan mes disponibel pa yuda e Komité Regional di Konstrukshon ounke nan no tabatin fishi den e ramo di konstrukshon. Ku tempu e pareha a haña entrenamentu i awor nan ta yuda pega blòki. E esposa a bisa: “Nos a bira masha bon amigu di e rumannan ku ta traha huntu ku nos. Na fin di dia, nos ta keda físikamente kansá pero spiritualmente refreská.”
6 Mediante e Predikashon: E trabou boluntario di mas importante ku nos por efektuá awe ta e predikashon di e Reino. Segun ku nos ta yuda hende komprondé i apliká konseho di Beibel, nan ta haña propósito den bida i e fortalesa pa vense kustumbernan perhudisial. Nan ta haña sa di Beibel su speransa alentador pa futuro. Mediante edukashon bíbliko, nos ta efektuá un sirbishi boluntario gososo ku ta trese benefisionan duradero. (Juan 17:3; 1 Tim. 4:16) Podisé nos sirkunstansianan ta permití nos partisipá mas tantu den e trabou aki dor di sirbi komo pionero ousiliar òf regular, muda bai kaminda tin mas nesesidat òf siña un otro idioma.
7 Rei David a profetisá ku durante e tempu ku e Mesias lo a kuminsá su gobernashon, e pueblo di Dios lo a “pone su mes disponibel.” (Sal. 110:3) Ya ku Yehova ta aselerando e kosecha spiritual final, tin hopi trabou boluntario pa hasi. (Isa. 60:22) Abo a bisa: “At’ami aki! Manda ami”? (Isa. 6:8) En bèrdat, ora nos ta demostrá un disposishon boluntario, nos ta agradá Yehova i ta risibí hopi bendishon.
[Study Questions]
1. Kon David ku Nehemias a demostrá un disposishon boluntario?
2. Dikon kristiannan mester demostrá un disposishon boluntario?
3. Kon un disposishon boluntario ta kontribuí na e reunionnan di kongregashon?
4. Den ki manera asina nos por demostrá un disposishon boluntario?
5. Den ki asuntunan relashoná ku Salòn di Reino tin mester di rumannan boluntario?
6. Dikon e ministerio ta e trabou boluntario di mas importante ku nos por efektuá?
7. Dikon un disposishon boluntario ta spesialmente importante awe?