“Bendishoná Ta un Hende Ku Ta Perseverá den Prueba”
1 Tur kristian ta haña nan konfrontá ku prueba. (2 Tim. 3:12) Prueba por bin den forma di malesa, problema ekonómiko, tentashon, persekushon òf den hopi otro manera. Pruebanan ku Satanas ta kousa ta diseñá pa pone nos baha man, pone nos neglishá nos ministerio kristian òf asta stòp nos di sirbi Dios. (Jòb 1:9-11) Den ki sentido perseveransia bou di prueba ta hiba na felisidat?—2 Ped. 2:9.
2 Prepará pa Prueba: Yehova a duna nos su Palabra di bèrdat den kua tin e registro di Hesus su bida i siñansanan. Ora nos ta tende e palabranan di Hesus i ta kumpli ku nan, nos ta pone un fundeshi sólido. Asina nos ta prepará nos mes pa pruebanan ku lo por bin. (Luk. 6:47-49) Tin otro provishonnan tambe ku ta duna nos fortalesa: nos rumannan kristian, reunionnan di kongregashon i nos publikashonnan basá riba Beibel ku ta bini for di e esklabo fiel i prudente. Nos ta hasi uso ampliamente di e regalo di orashon ku Dios a duna nos.—Mat. 6:13.
3 Yehova a duna nos un speransa tambe. Ora nos edifiká un fe fuerte riba Yehova su promesanan, nos speransa ta bira ‘un anker di e alma, sigur i firme.’ (Heb. 6:19) Den tempu bíbliko barkunan nunka no tabata sali for di haf sin un anker, ni ora tabatin bon wer. Ora un tormenta a kuminsá diripiente, nan tabata benta anker, i esaki por a evitá ku e barku lo a bai dal den baranka. Di mes manera, si nos edifiká nos fe awor riba e promesanan di Dios, esaki lo yuda nos para firme ora tormenta di problemanan surgi. Prueba por presentá diripiente. Ounke na prinsipio e aktividat di prediká di Pablo i Barnabas a haña un bon akohida serka e hendenan na Listra, e situashon a kambia rápidamente ora ku e oponentenan hudiu a yega.—Echo. 14:8-19.
4 Perseveransia Ta Trese Felisidat: Ora nos ta sigui prediká apesar di oposishon, nos ta haña un pas mental. Nos ta alegrá ora nos ser konsiderá digno di wòrdu desonrá pa motibu di Kristu. (Echo. 5:40, 41) Ora nos ta wanta bou di prueba esaki ta yuda nos kultivá kualidatnan manera, humildat, obedensia i perseveransia mas plenamente. (Deu. 8:16; Heb. 5:8; Sant. 1:2, 3) Perseveransia ta siña nos dependé riba Yehova, konfia den su promesanan i tuma refugio den dje.—Pro. 18:10.
5 Nos sa ku e pruebanan ei ta temporal. (2 Kor. 4:17, 18) Prueba ta duna nos oportunidat pa demostrá kon profundo nos amor pa Yehova ta. Ora nos ta perseverá bou di prueba, nos por perkurá un kontesta pa Satanas su akusashonnan. P’esei, nos no ta entregá! “Bendishoná ta un hende ku ta perseverá den prueba; pasobra unabes ku el a pasa e prueba, e lo risibí e korona di bida.”—Sant. 1:12.