Adorá Yehova Komo Famia
1 Den tempu bíbliko, miembronan di famia tabata hasi hopi kos huntu. Komo famia nan tabata hasi trabounan di kas i, mas importante ainda, adorá Yehova. (Lev. 10:12-14; Deu. 31:12) Pero den hopi pais awe, miembronan di famia ta hasi masha poko kos huntu. Sin embargo, kristiannan sí ta rekonosé e balor di hasi kos huntu komo famia, foral ora ta trata di adorashon. Sin duda, Esun ku a originá bida di famia ta keda masha kontentu ora e mira famianan ta ador’é huntu den union.
2 Prediká Huntu: Ora miembronan di famia ta traha huntu pa prediká e bon nobo, esaki ta uní e famia mas. P’esei, fuera di prediká huntu ku otro publikadónan di e kongregashon, un ansiano lo traha tambe regularmente ku su esposa i yunan. (1 Tim. 3:4, 5) Apesar ku superintendentenan biahero tin un programa hopi drùk, asta nan ta saka tempu pa traha huntu ku nan kasá den e ministerio.
3 Mayornan ku ta prediká huntu ku nan yunan por yuda nan progresá komo predikadó di e bon nobo. E muchanan no solamente lo opservá e goso i satisfakshon ku nan mayornan tin den sirbishi, sino tambe nan lo mira kon nan mayornan ta ekspresá nan propio amor pa Yehova i pa próhimo. (Deu. 6:5-7) Asta ora e muchanan na kas ta bira mas grandi ta importante pa mayornan prediká huntu ku nan. Un pareha ku tin tres yu hòmber entre 15 pa 21 aña ta sigui traha huntu ku nan den sirbishi regularmente. E tata a bisa: “Kada biaha nos ta siña nan algu. I nos ta perkurá pa e trahamentu huntu aki ta un eksperensia dushi i animante.”
4 Prepará Huntu: Famianan a ripará ku nan ta benefisiá ora nan prepará huntu pa sirbishi. Muchanan hopi bes ta gusta e seshonnan di práktika ora miembronan di famia ta tuma turno pa duna un presentashon òf pa sirbi komo doño di kas. Tin famia ta usa un par di minüt na final di nan estudio di famia pa hasi esaki.
5 Ora nos ta partisipá den aktividatnan importante ku ta duna satisfakshon huntu ku hende ku nos ta stima, nos ta haña mas goso. Ta masha dushi pa miembronan di famia traha huntu den sirbishi di vèlt, sea ta di kas pa kas, hasi rebishita òf kondusí estudionan di Beibel! P’esei, segun ku bo ta adorá Yehova huntu ku bo famia, bo por deklará ku goso: ‘Pa loke ta ami i mi kas, nos lo sirbi Yehova.’—Jos. 24:15.