Sigui e Ehèmpel Ku Hesus A Pone
1 Ora nos ta den e trabou di hasi disipel, nos tin ku tene na mente ku nos ehèmpel por tin un efekto poderoso riba hende ku ta opservá nos. Hesus a siña hende ku echo i palabra. Esnan ku a opserv’é por a mira su selo, su amor pa hende, su deseo desididu pa santifiká nòmber di su Tata i su determinashon pa kumpli ku e boluntat di su Tata.—1 Ped. 2:21.
2 Den Sirbishi di Kas pa Kas: Manera tabata den kaso di Hesus, nos ehèmpel tambe tin influensia riba esnan ku ta traha huntu ku nos. Publikadónan mas nobo i ménos eksperensiá ku ta mira nos partisipashon ku entusiasmo den sirbishi lo pensa riba e kalidat di nan partisipashon den e trabou di prediká. Ora nan mira nos goso i e berdadero interes ku nos ta mustra den otro hende, esaki lo yuda nan kòrda e importansia di demostrá kualidatnan asina den nan ministerio. Ora nan mira kon diligente nos ta den usa e Skritura, hasi rebishita i kondusí estudio di Beibel, nan lo ser motivá pa hasi meskos.
3 Ora di Kondusí Estudio di Beibel: Esnan ku spesialmente lo opservá nos kondukta ta nos studiantenan di Beibel. Por ehèmpel, maske nos kisas ta splika nan e importansia di prepará pa e estudio, buska e tekstonan di Beibel i hala liña bou di e puntonan klave, nan lo ripará si nos a prepará òf nò. (Rom. 2:21) Si nos ta puntual na nos afsprak pa studia ku nan, nan lo ta ménos inkliná pa laga otro aktividatnan interferí ku nan estudio di Beibel. Sin duda nan lo ripará tambe ku nos ta kla pa sakrifiká nos mes pa e ministerio i ku nos tin un fe fuerte. P’esei, no ta un sorpresa ku studiantenan di publikadónan ku ta sigui e ehèmpel di Hesus kuidadosamente ta bira predikadónan seloso i produktivo.
4 Ora Nos Ta Asistí na Reunionnan di Kongregashon: Tur persona ku ta forma parti di e kongregashon kristian ta yuda siña otro hende mediante nan ehèmpel na reunionnan di kongregashon. Personanan interesá ku ta kuminsá asistí na e reunionnan ta benefisiá di e bon ehèmpel ku nan ta opservá den e kongregashon. Nan lo ripará e kalor di amistat entre e rumannan, e union kristian i e manera modesto ku kristiannan ta bisti i areglá nan mes. (Sal. 133:1) Nan lo opservá ku nos ta asistí regularmente na e reunionnan di kongregashon i ku einan tambe nos ta hasi deklarashon públiko di nos fe. Un bishitante na un di nos reunionnan a ripará kon lihé un mucha muhé chikitu por a usa su propio Beibel pa buska i haña e versíkulonan ku ta ser menshoná; tambe el a opservá kon e mucha tabata sigui e lesamentu ku masha atenshon. E mucha aki su ehèmpel a motivá e bishitante pa pidi un estudio di Beibel.
5 E Skritura ta animá nos pa imitá otro su bon ehèmpel. (Fil. 3:17; Heb. 13:7) P’esei, nos tin ku kòrda ku si nos ta sigui kuidadosamente e ehèmpel ku Hesus a pone, otro hende lo opservá esei i e por tin un efekto positivo riba nan. Siendo ku esei ta asina, laga nos hasi kaso di e palabranan di 1 Timoteo 4:16 ku ta bisa: “Paga bon tinu na bo mes i na bo siñansa.”
[Study Questions]
1. Ki ehèmpel Hesus a pone?
2. Den ki maneranan nos ehèmpel por influensiá esnan ku ta traha ku nos den e ministerio?
3. Kon nos ehèmpel lo por instruí studiantenan di Beibel, i kiko e por siña nan?
4. Kiko nos ehèmpel ta siña otro hende ora nos ta asistí na reunionnan di kongregashon?
5. Dikon nos nunka mester balotá e balor di nos ehèmpel?