Kon Nos Por Yuda e Hendenan Ku Asistí na Memorial?
1 Dia 22 di mart 2008, miónes di hende rònt mundu lo risibí un testimonio poderoso. Esnan ku asistí na Memorial lo tende tokante e gran amor ku Yehova a desplegá ora el a perkurá e reskate pa humanidat. (Juan 3:16) Nan lo siña tokante e Reino i kon Yehova lo us’é pa kumpli ku su boluntat pa henter e tera. (Mat. 6:9, 10) Nan lo mira personalmente e amor i unidat di e pueblo di Dios, i eksperensiá nos hospitalidat di kurason.—Sal. 133:1.
2 Studiantenan di Beibel: Lo tin algun hende presente ku nos a kuminsá studia Beibel resientemente kuné. Laga nan sera konosí ku e rumannan. Splika nan tokante e reunionnan semanal, i duna un tour breve den e Salòn di Reino. Durante e diskurso, e oradó lo animá nan pa sigui desaroyá nan relashon ku Yehova. Bo por usa su komentarionan komo base pa animá bo studiantenan.
3 Publikadónan Inaktivo: Lo tin publikadónan inaktivo presente. Tuma inisiativa pa kumindá nan kalurosamente. No hasi preguntanan personal ni remarkenan ku por kousa bèrgwensa. Despues di Memorial, e ansianonan tin ku bishitá kualke publikadó inaktivo ku a asistí, elogiá nan pa e esfuerso ku nan a hasi pa asistí i invitá nan kordialmente pa e siguiente reunion di kongregashon.
4 Bishitantenan: Lo tin algun hende presente ku podisé ta konosínan òf miembronan di famia ku nos mes a invitá. Otronan podisé a haña un invitashon durante e kampaña spesial. Si tin hende ku bo no konosé, tuma inisiativa pa sera konosí ku nan i duna nan un bonbiní. Kisas ta promé biaha ku nan ta asistí na nos reunionnan. Ora bo kòmbersá ku nan lo bo por haña sa kon pa tuma kontakto ku nan. Dor di hasi un bishita òf yamada di telefòn kòrtiku un par di dia despues di Memorial, lo bo por purba animá nan pa siña mas i ofresé un estudio di Beibel.
5 Nos lo por usa e informashon di e diskurso di Memorial komo base pa introdusí e buki Beibel Ta Siña ora nos ta hasi rebishita. Por ehèmpel, e oradó lo lesa Isaias 65:21-23. Durante e bishita, lo bo por menshoná e diskurso i bisa, “Laga mi mustra bo otro bendishon ku e reskate lo hasi posibel.” Despues konsiderá página 4 i 5 di e buki Beibel Ta Siña. Òf lo bo por bisa, “Hopi hende ta puntra nan mes ta na ki tempu nos lo mira kumplimentu di e profesia di Isaias.” Despues konsiderá paragraf 1-3 di kapítulo 9. Òf tambe bo por djis referí na e komentarionan di e oradó, introdusí e buki Beibel Ta Siña i mustra e persona kon e estudio ta bai.
6 Laga kada un di nos buska oportunidat pa yuda studiantenan di Beibel, publikadónan inaktivo i bishitantenan ku asistí na Memorial. (Luk. 22:19) No kabe duda ku Yehova lo bendishoná tur e esfuerso èkstra ku nos hasi den nos sirbishi di Reino.
[Study Questions]
1. Ki testimonio poderoso hende lo risibí dia 22 di mart 2008?
2. Kon nos por yuda studiantenan di Beibel ku ta presente?
3. Kon nos por animá publikadónan inaktivo ku ta presente?
4. Kon kada un di nos por yuda bishitantenan?
5. Kiko nos por bisa pa kuminsá un estudio di Beibel?
6. Ki oportunidat nos tin segun ku nos ta obedesé e mandamentu di Hesus pa konmemorá su morto?