Duna Nan un Bonbiní!
1. Ki okashon ta brinda nos un bon oportunidat pa duna testimonio i dikon?
1 Tur aña e selebrashon di Memorial ta brinda nos un bon oportunidat pa duna testimonio. Pensa riba esaki: E aña akí, nos ta ferwagt un asistensia di mas ku dies mion bishitante ku lo bini Memorial pa skucha tokante e dos ekspreshonnan di amor di mas grandi ku a keda demostrá mediante e reskate. (Huan 3:16; 15:13) Nan lo haña sa di e bendishonnan ku nan por risibí pa medio di Yehova su provishon. (Isa. 65:21-23) Pero no ta e oradó so lo duna testimonio na e okashon akí. Nos tur lo haña oportunidat pa duna un bon testimonio ora nos ekstendé un kaluroso bonbiní na e invitadonan.—Rom. 15:7.
2. Kon nos por duna e bishitantenan un kaluroso bonbiní?
2 En bes di yega kai sinta, keda ketu i warda e programa kuminsá, dikon no tuma inisiativa i sera konosí ku e karanan nobo banda di bo? E bishitantenan por ta un tiki nèrvioso, pasobra nan no sa kiko ta bai pasa eksaktamente. Pues un sonrisa amigabel i un saludo kordial por laga nan sinti nan mes na kas. Pa sa si un persona a bini pasobra el a haña un invitashon, bo por puntr’é si ta promé biaha e ta bini un di nos reunionnan òf si e konosé un miembro di e kongregashon. Kisas bo por invit’é pa sinta banda di bo, di manera ku e por wak huntu ku bo den bo Beibel i buki di kantika. Si e Memorial ta na Salòn di Reino, kisas bo por dun’é un tour kòrtiku. Despues di e diskurso, ofres’é pa kontestá kualke pregunta ku e por tin. Si bo kongregashon tin ku sali lihé pa un otro kongregashon por reuní, bo por bis’é: “Mi tin gana di sa kon bo a haña e reunion. Tin un manera ku mi por tuma kontakto ku bo?” Kaba, traha un afsprak pa sigui papia kuné un otro dia. Pa loke ta e publikadónan inaktivo ku asistí, spesialmente e ansianonan mester ta atento pa animá i yuda nan.
3. Dikon ta importante pa nos tuma inisiativa pa duna bishitantenan na Memorial un bonbiní?
3 Pa hopi bishitante, esaki lo ta e promé biaha ku nan ta bai eksperensiá e goso, pas i union ku ta reina den e paradeis spiritual ku nos komo e pueblo di Yehova ta disfrutá di dje. (Sal. 29:11; Isa. 11:6-9; 65:13, 14) Ki impreshon nan lo keda kuné? Esei lo dependé di kuantu esfuerso nos lo hasi pa duna nan un bonbiní.