Duna Gradisimentu na Yehova pa Su Bondat Amoroso
Lo Konmemorá e Morto di Kristu Dia 24 di Mart
1 E salmista a sklama: “Laga nan duna gradisimentu na SEÑOR pa su miserikòrdia [“bondat amoroso,” NW], i pa su maravianan na e yunan di hende!” (Sal. 107:8) Dios su bondat amoroso ta mas ku djis un sintimentu tierno ku e tin pa hende. Esaki ta bisto den e deklarashon di alabansa inspirá: “Bo miserikòrdia [“bondat amoroso,” NW], o SEÑOR, lo sostené mi.” (Sal. 94:18) E echo ku Yehova a duna su yu unigénito na nos fabor sigur ta un manera ekstraordinario ku el a mustra su bondat amoroso!—1 Juan 4:9, 10.
2 Kon nos por gradisí “e Dios di bondat amoroso,” segun ku e Memorial di e morto di Kristu ta yegando serka? (Sal. 59:17, NW) Lo ta bon pa nos kada un apartá tempu pa meditá riba Hesus su último dianan aki riba tera. (Sal. 143:5) Nos lo benefisiá tambe dor di sigui e programa spesial di lesamentu di Beibel pa e periodo di Memorial, manera e ta aparesé den Eksaminando e Skritura Diariamente—2005 i, si ta posibel, lesa i hasi mas investigashon den e buki Homber mas importante na e kapítulonan 112-16 i otro publikashonnan basá riba Beibel. Meditá riba e pasashinan ku bo lesa, i sea intensamente okupá ku nan. (1 Tim. 4:15) Dor di hasi orashon i reflekshoná riba e Palabra di Dios bo no ta solamente alimentá bo kurason, sino tambe ekspresá bo amor pa Yehova.—Mat. 22:37.
3 Motivá Otro Hende pa Gradisí Dios: Aña pasá, 16.760.607 persona a asistí na e Memorial rònt mundu. Algun aña pasá e rumannan den un pueblo na Liberia, a skirbi e hefe di e pueblo un karta i a inform’é ku nan tin intenshon di konmemorá e Sena di Señor den su pueblo. E hefe a duna e rumannan pèrmit pa usa e vèlt di bala lokal pa tene e evento i el a laga hasi un anunsio den henter e área pa invitá hende. Ounke tabatin solamente 5 publikadó den e pueblo ei, e asistensia pa e Memorial tabata 636!
4 Di mes manera nos tambe ke invitá mas tantu hende posibel pa djòin nos pa e selebrashon di e Memorial. Pakiko no traha un lista di esnan ku bo ke invitá? E plachinan riba kaft patras di e Spièrta! di 8 di mart i Toren di Vigilansia di 15 di mart ta ekstendé un invitashon. Por usa e invitashonnan imprimí pa Memorial tambe. Taip òf skirbi e ora i sitio di e konmemorashon riba e invitashon i laga unu serka tur persona ku bo invitá. Segun ku 24 di mart ta yega serka, bai bèk i rekordá kada un di nan i hasi e areglonan final.
5 Kon nos por yuda studiantenan di Beibel ku ainda no ta bini reunion pa asistí i benefisiá plenamente di e evento aki? Dediká un par di minüt durante kada estudio pa yuda nan komprondé e importansia di e konmemorashon. Nos por haña ekselente informashon den e Toren di Vigilansia di 15 di mart 2004, página 3-7, i den e buki di Rasonamentu na spañó na página 83-6.
6 Risibí e Bishitantenan Kordialmente: Ora e bishitantenan bini Memorial, aserká nan i duna nan un bonbiní. (Rom. 12:13) Hasi areglo pa bo sinta banda di e personanan ku bo a invitá, i hasi sigur ku nan tin un Beibel i un buki di kantika. Ta bon pa nos tuma inisiativa pa duna un bonbiní foral na tur ruman inaktivo ku a hasi esfuerso pa bin. Podisé nos interes amoroso por yuda nan bolbe kuminsá asosiá regularmente ku e kongregashon. (Luk. 15:3-7) Na e okashon di mas sagrado aki, laga nos hasi tur loke nos por pa animá otro hende pa djòin nos den duna gradisimentu na Yehova pa su “maravioso bondat amoroso.”—Sal. 31:21, NW.
[Study Questions]
1. Kon Yehova a mustra su bondat amoroso na nos?
2. Kon nos por mustra nos gratitut na Yehova?
3, 4. (a) Kon nos por imitá e aktitut di nos rumannan na Liberia? (b) Ken bo ta plania pa invitá pa Memorial?
5. Kon nos por animá studiantenan di Beibel pa asistí?
6. Dikon ta importante pa risibí bishitantenan kordialmente na e Memorial?