Estudio Personal i di Famia Ta Hopi Importante!
1 Meskos ku den promé siglo, e Kuerpo Gobernante djawe ta preokupá pa e bienestar di Yehova su pueblo. (Echo. 15:6, 28) Segun ku nubianan skur di e gran tribulashon ta aserká, ta masha importante pa kada publikadó di Reino tin un relashon fuerte ku Yehova. Kiko lo bo hasi ku e tempu ku bo tabatin programá pa Estudio di Buki di Kongregashon? Ta bon pa usa e tempu akí pa adorashon komo famia. Nos por hasi bon uso di e tempu akí pa hasi mas investigashon den e Palabra inspirá di Dios i benefisiá di su siñansanan.—Sal. 1:1-3; Rom. 11:33, 34.
2 Adorashon Komo Famia Parti Anochi: Un animashon ta bai na kabesnan di famia pa tuma e responsabilidat ku nan tin dilanti di Yehova na serio pa perkurá pa e famia tin un programa di estudio di Beibel riba un base regular i ku nan lo por saka benefisio for di dje. (Deu. 6:6, 7) Rumannan soltero ku no tin responsabilidat di famia lo por usa e tempu akí pa estudio personal di Beibel i pa hasi mas investigashon. Ta masha importante pa kada un di nos ‘hasi bon uso di nos tempu’ dor di studia i meditá pa asina nos por keda ku e forsa spiritual nesesario apesar ku “e dianan ta malu.”—Efe. 5:15, 16.
3 Loke Famianan Por Studia: E Indèks di Publikashonnan Watch Tower òf e Watchtower Library riba CD-ROM por yuda bo haña informashon ku por hasi e estudio di famia agradabel. Famianan por konsiderá artíkulonan ku ta sali den E Toren di Vigilansia, manera “Página pa Hóbennan.” Den e edishon públiko na otro idiomanan ta sali rúbrikanan manera, “Konseho Práktiko pa un Bida di Famia Felis,” i “Siña Bo Yunan.” Ademas, ¡Despertad! tin e seri “Hóbennan Sa Puntra” ku tin artíkulonan fasinante tokante maravianan di kreashon.
4 Ora un famia tuma tempu pa lesa Beibel huntu, lo ta mas fásil pa kada un di nan keda kòrda prinsipionan bíbliko i apliká nan den nan bida. (Heb. 4:12) De bes en kuando, boso lo por wak un di e vidionan di e organisashon i despues papia riba dje. Lo bo por usa bo kreatividat pa skohe kiko pa studia i kon pa studi’é. Bo por puntra bo famia tambe kiko nan lo ke studia i kon?
5 Dikon E Ta Importante Awor: Dor di fortalesé nos spiritualidat, nos lo prepará nos mes pa por “para firme i mira e salbashon” di Yehova. (Eks. 14:13) Mayornan tin mester di guia divino pa lanta nan yunan “meimei di un generashon korumpí i pèrvèrso.” (Fil. 2:15) Yunan mester di yudansa pa trata na un manera efikas ku dekadensia moral na skol. (Pro. 22:3, 6) Ta bon pa parehanan kasá fortalesé nan “kordon lorá tripel” ku nan a forma ku Yehova. (Ekl. 4:12) P’esei, laga nos hasi bon uso di e tempu ku a keda pa sigui edifiká nos “santísimo fe”!—Hudas 20.
[Study Questions]
1. Ki preokupashon Kuerpo Gobernante tin aktualmente, i dikon?
2. Kon nos por programá adorashon komo famia parti anochi?
3, 4. Ki informashon nos lo por usa pa e estudio di famia i ku ki meta?
5. Dikon estudio personal i di famia ta asina importante den nos bida awor?