E Trabou di Prediká Ta Yuda Nos Keda Spiritualmente Fuerte
1. Kon e trabou di prediká ta benefisiá nos?
1 Ora nos ta partisipá den e trabou di prediká, esei por fortalesé nos spiritualmente i hasi nos mas felis. Klaru ku e motibu prinsipal pakiko nos ta partisipá den sirbishi ta pa agradá Yehova. Sinembargo, ora nos ta obedesé e mandamentu pa “prediká e palabra,” nos ta risibí Yehova su bendishon i nos ta benefisiá den otro maneranan tambe. (2 Tim. 4:2; Isa. 48:17, 18) Kon e trabou di prediká por fortalesé nos i hasi nos felis?
2. Den ki maneranan e trabou di prediká ta fortalesé nos?
2 Nos Ta Ser Fortalesé i Bendishoná: E trabou di prediká ta animá nos pa enfoká riba e bendishonnan di Reino en bes di riba e problemanan ku tin aktualmente. (2 Kor. 4:18) Ora nos ta splika siñansa bíbliko na otro hende, esei ta fortalesé nos fe den Yehova su promesanan i e ta oumentá nos apresio pa e bèrdat. (Isa. 65:13, 14) Segun ku nos ta yuda otro hende krese spiritualmente pa yega na e punto kaminda “nan no ta [parti] di mundu,” nos ta fortalesé nos determinashon pa keda separá for di mundu.—Juan 17:14, 16; Rom. 12:2.
3. Kon e trabou di prediká ta yuda nos kultivá kualidatnan kristian?
3 Ademas, e trabou di prediká ta yuda nos kultivá kualidatnan kristian. Por ehèmpel, miéntras nos ta hasi esfuerso pa “bira tur kos pa tur hende,” esei ta yuda nos bira mas humilde. (1 Kor. 9:19-23) Segun ku nos ta papia ku hende ku ta “kansá i plamá, manera karné sin wardadó,” nos ta siña mustra kompashon i komprenshon. (Mat. 9:36) I nos ta siña perseverá apesar di indiferensia i oposishon. Nos ta haña mas goso ora nos usa nos bida pa yuda otro hende.—Echo. 20:35.
4. Kon bo ta mira bo sirbishi?
4 Ta un gran privilegio ku mediante e trabou di prediká nos por duna alabansa na e úniko Persona ku meresé nos adorashon. E trabou di prediká ta fortalesé nos. E ta trese bendishon na abundansia pa esnan ku ta kompletamente apsorbá den “duna testimonio di e evangelio.”—Echo. 20:24.