Siña Hende na un Manera Simpel
1. Kua ta un aspekto importante ora nos kier siña hende na un manera efektivo i kla?
1 Si nos kier ta efektivo, ta masha importante pa nos siña hende na un manera simpel. E manera ku e Gran Maestro, Hesus, a siña hende por yuda nos mehorá nos “arte di siña.”—2 Tim. 4:2, NW; Juan 13:13.
2. Kiko siña hende na un manera simpel ta enserá, i ki efekto esei por tin?
2 Papia na un Manera Simpel: E Sermon Riba Seru ta kontené algun di e bèrdatnan mas profundo den historia; nan a ser ekspresá na un manera masha simpel. (Mat. kap. 5-7) E multitut ku a skucha Hesus a “keda asombrá di su siñansa.” Loke Hesus a bisa a konmové e ofisialnan ku mester a arest’é asina tantu ku nan a bisa: “Nunka un hende no a papia manera e hòmber akí ta papia.” (Mat. 7:28, 29; Juan 7:46) Nos no tin ku usa palabranan grandi, ni frasenan kompliká, ni duna ehèmpelnan detayá pa nos por konvensé hende di delaster un detaye di e bèrdat. Nos por usa palabranan ku ta bon konosí pa splika hende e bèrdat na un manera kla.
3. Dikon algun di nos tin e tendensia di duna demasiado informashon na nos oyentenan, i kon nos por evitá esei?
3 Determiná Kuantu Informashon Bo Ta Trata: Hesus a tene kuenta ku su oyentenan pa determiná kuantu informashon lo e trata kada biaha. (Juan 16:12) Nos tambe mester opservá kiko ta nesesidat di esnan ku nos ta papia kuné pa nos por adaptá nos mes na nan, spesialmente ora nos ta duna testimonio na nos famianan, hende resien interesá òf mucha. Asta ora ta parse ku nan ta skucha atentamente, nos mester tene kuidou pa no duna nan demasiado informashon. Esnan ku ta sinsero lo sigui atkerí konosementu di e Dios berdadero, Yehova.—Juan 17:3; 1 Kor. 3:6.
4. Dikon ta benefisioso pa enfoká riba e puntonan prinsipal i no riba detaye?
4 Enfoká Riba e Puntonan Prinsipal: Hesus a evitá di usa hopi detaye pa no hasi loke e tabata siña hende mas kompliká. Un biaha el a bisa: “Tur ku ta den graf . . . lo sali.” Na e momento ei no tabata nesesario p’e duna mas detaye tokante e dos destinashonnan pa esnan ku lo resusitá. (Juan 5:28, 29) Ora nos ta studia Beibel ku un hende, nos mester enfoká riba e puntonan prinsipal i dominá nos mes pa no trese informashon adishonal innesesario padilanti.
5. Ki bendishon nos por haña si nos ta siña hende na un manera simpel?
5 Esta gradisidu nos ta ku na un manera simpel Yehova a siña nos tur loke nos mester sa! (Mat. 11:25) Laga nos hasi esfuerso pa siña hende na un manera simpel i eksperensiá e goso di tin un sirbishi fruktífero.